本土語園地

舊曆八月的秋天

華語原作：游冠軍老師 台文撰寫校對:黃登英老師、黃玟錦老師

這馬已經是八月矣。咱家鄉有一句俗語講：二八月亂穿衣。意思是講八月時，因為天氣連鞭寒、連鞭熱，所以咱人穿衫嘛會連鞭短䘼、連鞭長䘼。

咱宜蘭傳統的農村較無佇八月十五中秋節，毋過若講著咱定定佇食的中秋餅，其實佇咧過去，嘛分足濟種(tsióng)的，有平西餅、有膨餅、嘛有大餅，猶閣有咱這馬較捷食的『蛋黃酥』（華語），號做「卵仁酥」，猶閣一種這馬真流行的『廣式月餅』（華語）。

若講著海產咱南方澳仔對(uì)這馬八月開始，較大出的有花飛、巴浪、白帶魚、鯊魚，若花飛咱本海佇掠的，主要是「烏目蕊仔」這種；嘛有「白肚仔」，但是較少(tsió)；巴浪這馬是「鳥尾巴浪」較濟。

咱這个舊曆八月，實在是一个物產豐富，天氣多變的月份。

風颱上濟的舊曆七月

華文寫作: 游冠軍老師  台文撰寫: 黃登英老師  校對:黃玟錦老師

阮學校這禮拜就開學矣，對開學到這馬，天氣佮暑假仝款，攏足熱，冠軍老師有講過一句俗語：秋會曝死鰗鰡。意思就是講，秋天若熱起來會比熱天較熱。這馬拄好是舊曆七月，是風颱上濟的時陣，電視新聞不時嘛佇報，講佗位閣走一个風颱出來。風颱敢真正會走來咱台灣? 咱老祖先捌留一句俗語予咱，講：一雷破九颱。意思就是講，佇七月當中若有聽著天頂佇咧霆雷，這就表示對這馬起，風颱袂閣走來咱台灣。

過去，台灣民間佇七月的時，有足濟禁忌。「袂當去外口耍水」就是其中一个禁忌。嘛有人講七月的時，水內底有水鬼，水鬼會共耍水的人搝(giú)入去水底。所以愛等七月結束的時，所有的鬼攏關入去陰間(im-kan)了後，才會使去耍水。

冠軍老師無相信有鬼，但是伊嘛建議，七月時若有風颱接近台灣，欲去耍水的人就愛特別注意，看海湧有變較雄無? 嘛愛注意溪水有較掣流無? 若有，就愛盡量莫去水底耍水，才袂發生危險。

《宜蘭雨落到五月初五》    作者:游冠軍  台文編寫:黃登英  校稿:黃玟錦

咱宜蘭佇五日節進前，攏會盡厚雨。頂禮拜，規禮拜攏佇落。以早有一句俗語講：閬晝落到哭。就是佇講有當時仔，早起一直落袂停，到中晝時突然間無雨矣，逐家就想講:「等咧欲好天矣…」，結果雨是小可仔閬一咧爾，就閣繼續一直落，落袂煞，落甲逐个人攏想欲哭。

咱宜蘭老歲仔彼沿的(–ê)捌講過，春天的雨一定愛落到午日節才會停，到底啥物原因?無講。敢會是，天公伯仔知影五日節彼工，咱逐家欲扒龍船，所以一直落雨，予咱宜蘭的大河川的水攏飽滇起來。

冠軍老師講每年佇五日節進前，咱宜蘭真濟湖佮大埤，邊仔的水田底，攏會當看著規陣的魚仔，對湖墘泅到水田底，遮的(tsia-ê)魚仔欲擱搢(台語字典發音:tsìnn，宜蘭的長輩發音:tsiàn)水，入去到山頂的溪仔頭放卵，遮的(tsia-ê)魚仔內底有一種號做〝戇魚〞，因為以早的做穡人，共專門搪魚仔的〝笱〞囥佇水田的〝田pān隙(khiah)〞，無偌久這種魚仔就會家己軁（nǹg）入去笱內底。毋但按呢，?擱家己會曉撨摵空間，予逐尾魚仔攏會當櫼(tsinn)入去，做穡人來收笱的時，遮的(tsia-ê)魚仔已經櫼共實實實(tsa̍t)，擱排共整齊整齊，所以逐家看著按呢，就共叫做〝戇魚〞。這馬這種魚仔受著地方環保人士的保護，佇咱礁溪鄉龍潭湖邊有一條圳溝仔，佇五日節進前，攏會使看著規陣的戇魚，佇內底欲搢水，入去到山頂的溪仔頭，環保單位真歡迎各所在的遊客去到遐參觀，但是袂使共魚仔掠轉去。

愈倚近五日節，咱蘇澳本海的飛烏虎就愈掠愈大尾，旗魚、串仔(tshǹg-á)嘛已經大出矣！最近風湧傷大，老師講等新曆六月十四彼工，海水大流洘的時，伊才欲?阮去海墘仔耍。

透西南風的海田岸(一)            2022.03.05 游冠軍老師

咱學校四周圍，是一个百外甲的保護地，保護真濟天然的物種，有足罕得看得水草、魚蝦、田桮、蜊仔，嘛有真濟種野生的水鴨仔。聽陳阿伯講，會對外地飛來咱遮的水鴨仔，差不多有十外種。花喙仔、青頭公仔、水phiu 仔(小水鴨)、羅文鴨、埤嘴鴨、尖尾鴨這幾若種水鴨仔，上捷飛來咱遮。對三月開始，一寡外地飛來咱遮的水鴨仔，會規陣飛去到幾若千公里以外的北爿，踮佇遐生湠。?是按怎攏佇三、四月，才欲飛轉去北爿? 陳阿伯講，咱宜蘭對三、四月起，開始透西南風，水鴨仔必需要倚靠西南風，才有法度飛到遐爾仔遠的所在。

冠軍老師捌?阮規班去泡泡湧泉遐耍水，阮佇一窟閣一窟的水埤仔當中，選一窟上大窟水埤仔，撩落去泅水。老師講這規个保護區，以早雖然是田地，毋過遮的田底是世界上罕的看得冷泉水，嘛是舊河川的出海口，佮海相接連，內底有太濟別位揣無的環境特色。到尾仔，逐家決定欲共保護起來，經過共政府申請通過，遮就按呢正式受著國家的保護。

各種高低形體的野生花草，佇以早的田岸頂，一直生長。只要安靜咱的心來感受，用心找揣，透西南風的海田岸，內底藏有咱欣賞袂了的美景佮故事。

蘇澳的秋天（一）

蘇澳的秋天定定落雨，天氣連鞭冷，連鞭熱。學校邊仔的海墘，開始透東北風，海湧開始變大，海水嘛變較濁。阮暫時袂當浸海水，只會使坐佇海墘吹海風、聽海湧聲、欣賞海的千變萬化。

頂個月，我們全班都去海沙埔撿「漂流木」，「漂流木」就是予海浪拍起沙埔頂的材枝。冠軍老師邀請一位柯林國小的黃老師，來教阮按怎利用海邊撿來的天然材枝，經過手工處理，做出有藝術價值的湯匙、攕仔。製作過程中，我們發現海邊揀來的材枝，經過粗紙磨過了後，攏會現出真媠的紋路（台語俗稱: “花草”）。有的材枝，磨過了後，表面變甲足幼，摸起來足滑溜的。

對蘇澳的秋天到寒天，有一寡魚仔開始大出矣。頂禮拜，陳阿伯佇海墘釣著規桶的「幽面仔魚」(卵鰺、裴氏鯧鰺)、「瓜子魽」(巴布亞鰺)。冠軍老師最近嘛對南方澳仔買足濟「瓜子魽」(巴布亞鰺)轉來，伊閣共最近大出的魚仔，用手機翕落來，提予阮逐家看，除了「瓜子魽」，猶閣有：土魠、馬加、大目孔、煙仔虎(齒鰆)、串仔(鮪魚)、紅魽 (杜氏鰤)、紅目魽、虱目仔、四破 (長身圓鰺)、七星（逆鉤鰺）、黑魽（白舌尾甲鰺）、虎頭魽（小甘鰺）、鬚魽（印度絲鰺）、白帶魚、青魽（雙帶鰺）。

這禮拜，丞恩?阿公來咱教室，教阮按怎處理拄掠起來的花飛(鯖魚)。有用煎的，嘛有煮湯的，也有刣做さしみ(生魚片)的。蘇澳的秋天，真正是一个食好魚仔的好時陣。

西魯肉 — 宜蘭手路菜介紹01      2023.03.29 游冠軍

頂禮拜台語課，大家講到過年期間的活動，嘛有講到過年每一个人兜，攏會家己做豐沛的料理佮點心。今仔日咱來繼續介紹宜蘭的手路菜，手路菜佇咱平時定煮常定食的菜無仝，每一項手路菜攏有伊的故事，嘛有伊家己特別的味道。佇煮手路菜的時，配料佇放，袂使傷凊彩，需要遵照一寡傳統，佇煮的人，家己本身嘛愛有一寡功夫，才煮有路來。

認捌宜蘭的手路菜，會予咱更加了解宜蘭的文化佮歷史，嘛對宜蘭的特產，佮環境特色，有閣較深的感受。今仔日欲講的手路菜，號做「西魯肉」。這項菜的上源頭，是佇以早的農村。彼當陣，逐家都較散，若有客人來厝裡面食飯，主人厝裡面若拄好無豬肉、雞肉通請人客，就會闔幾粒仔雞蛋，閣共抐抐一下，倒落去熱油底烰，烰到酥酥香香時才共撈起來。才閣用蝦米、香菇芡芳，下水，下寒天上大出的冬北仔，等這坩湯滾起來了後，才共拄才烰好的蛋酥，下落去。這坩湯裡面，雖然干焦有冬白仔，佮幾粒蛋爾爾，但是佇啉當中，一直有蛋酥發出來的芳氣，予人啉起來足像肉湯。後來，逐家經濟愈來愈好，要煮湯請人客食，湯內底當然會囥真濟好料。毋過，逐家猶原會懷念以早，燒湯裡底那種冬白仔菜佮蛋酥，濫做伙的香氣佮口味。

「西魯肉」這路菜是按怎會號做西魯肉？「西魯」是日語「湯」的意思，西魯肉的「肉」，是佇講蛋酥發出來的肉味。所以講，西魯肉這路菜的傳統原味，湯頭一定愛有大白菜佮蛋酥的味，然後才閣加其他的配料。到底愛下佗幾項配料? 其實攏是予煮的人自己去安排。佇蘇澳地區，西魯肉裡面會下真濟海產，若佇較講究的人兜，西魯肉裡面會下魚翅、海參、鮑魚，各種較貴的配料。

西魯肉愛按怎煮較好吃? 冠軍老師感覺這路菜的好吃，秘訣是在芡芳，蝦米先芡芳，等蝦米芳氣走出來，才閣下香菇落去芡芳，等這兩項的芳味攏走出來，才下其他配料落去炒，配料攏總炒芳了後，才閣下水開始?，等湯滾起來了後，才下冬白仔，繼續?十五分鐘，才切做細火，若欲先食，切細火了後就會使食矣。食進前，愛會記咧共拄才烰好的蛋酥，下落去規坩的西魯肉頂面，這路菜蔬到遮就算完成矣。

西魯肉有真濟宜蘭人對家鄉的感情，宜蘭人每一擺食西魯肉，攏會想起過去，真濟以早隨人的人生經歷、故事。 以早教冠軍老師北管的一位阿公捌講過，宜蘭的北管，曾經嘛有一段故事，跟西魯肉有關係。是啥麼故事? 就等有時間，才請冠軍老師講給咱聽。

岳明國小師生 航海前 行禮歌   

美麗無邊  清氣母親大海

力大豐沛  咱人無法攏知

養飼眾生  無盡直到萬代

阮來到您面前 全心敬拜

— —- —- —-   —

一隻小船  載阮滿心意愛

請您?阮  看盡大千世界

藍色海天  金色海湧發光

行船辛苦  考驗阮敢擔當

— —- —- —- —  – –

大海媽媽  在世間受破壞

您的囝兒  今入海欲保護

沿途望您  伸手慈悲看顧

賞賜氣力  予阮平安喜樂

這首歌歌詞是冠軍老師編寫，歌曲旋律，是借用

基督教台灣長老教會的一首台語聖詩的旋律，

大家有興趣歡迎到岳明中小學，聽師生齊唱，

非常感人而震撼的台語航海歌喔~~