本土語園地

《甘願允山頂一隻豬，嘛無愛允海底一尾魚》  游冠軍老師華語解說

南方澳地區的漁人們把大海的漁獲，視為上天神聖的賞賜，每次出海，都謙卑地等候今日上天賜下無法事前預料的漁獲，就像拆禮物得心情，禮物只能當天拆開，無法事前預知，並且感恩接受今天拆開的禮物。  許多不知情的買客，會向魚販或船家，預購註文某種魚、數量，其實在漁人的觀念裡，這是對大海的不敬。所以漁人們以這句俗諺，向人表明，從海而來的漁獲，不可隨意預約預購。

本月有獎徵答一 :

無尾港保護區各種野生水鴨中，有些有自己原本的台語稱呼，請找出其中七種野生水鴨原先的台語稱呼。 

本月有獎徵答二 : 無尾港海邊的眾多貝殼中，有些原本就有阿美語的稱呼，請找出其中七種貝殼原先的阿美語稱呼。

本月有獎徵答三 : 宜蘭海邊的眾多螺貝殼，有些原本就有台語的稱呼，請找出其中十種螺貝原先的台語稱呼。

舊曆五月十六大流洘   作者：游冠軍  台文：黃登英  校稿：黃玟錦

這禮拜的節氣，是對芒種(bông-tsíng)進入到夏至，咱宜蘭四界的水田，攏會使看著規欉的稻仔對著穗一直飽仁起來，規片田望過去，已經對草仔色反做深黃色矣。

頂禮拜二拄好是咱遮的海墘仔大流的時陣，冠軍老師央陳阿伯?咱規班的囝仔，去海墘仔黜(thuh)tshián-tshuann—á(笠螺)，順紲挽一寡仔海菜。陳阿伯自細漢就佇咱嶺腳遮大漢，伊講這改的大流，海水會退一百公尺，這款大流洿一年才兩擺爾爾。 阮先綴冠軍老師行落去海沙埔，那行那看海水，阮看著海水退去了後，海沙埔有足濟窟仔一直浡清氣水出來，冠軍老師講這款清氣水毋是海水，是清氣冰涼的山溪仔水，伊講以早伊定定佇海沙埔耍水，無意之間才發現著這个秘密，原來宜蘭倚山的海墘，一直攏有山溪仔水對海底浡出來。

行到澳仔角的洿流底，陳阿伯已經黜規仔粒大粒的tshián-tshuann–á落來矣，冠軍老師用一跤橐仔共貯起來，紲落去換阮規班的同學落去黜，冠軍老師講：黜起來的tshián-tshuann—á，欲共豉豆油，做一項足利口的小菜。

結果海水退甲一百公尺的洿流底，上濟的毋是tshián-tshuann—á，是紅頭螺，逐个看著遮濟大粒的紅頭螺，對黜tshián-tshuann–á就開始沒心沒情(tsiânn) 矣，一个一个攏蹽落去撿紅頭螺。這逝，陳阿伯?阮來洿流底，予阮捉著太濟平常時足罕得看的動物仔，有刺膽、花鮡(hue-thiâu，礁岸的彈塗魚)、蠘仔、蟳仔、刺螺、蟯仔(giô-á)、海蜈蜞…。

阮逐个攏耍甲毋甘離開，但是老師講海水已經開始佇飽流矣，若無趕緊起來，閣過一睏仔就看袂著水底的石頭，到時若欲peh起來岸頂就較會跋倒，所以為著顧安全，逐家攏趕緊起來，佮老師做伙行轉去學校矣。

〝四月煙，免油煎〞

作者：游冠軍 台文：黃登英 校稿：黃玟錦

頂禮拜老師共咱講伊炒米粉好食的撇步。伊講拄開始欲芡芳的時，蝦米先囥入去鼎底，愛等蝦米芳味已經走出來，才會使擱共香菇下落去（合音唸作lueh），香菇的芳味已經煏出來，才會使擱囥其他的配料，芡芳好了後，嘛愛囥豆油、鳥醋、油蔥酥佮煙仔魚粉，煙仔魚粉會予米粉食起來更加有一款海的滋味。冠軍老師感覺：這款煙仔魚粉的滋味，才是正港咱蘇澳在地的氣味。

煙仔魚是咱蘇澳本海的特產，咱蘇澳人共沿海的固定網號做「煙仔空」，意思是沿海的「固定網」掠著的魚仔，主要是煙仔魚，這馬南方澳仔的煙仔魚已經大出矣；其中的花煙肥擱大尾，若是早起掠的花煙，到下晝攏會使刣sa33 si55 mih3來食。有一句俗語講：四月煙，免油煎。意思是講逐年舊曆四月，拄好是煙仔魚上肥、上好食的時陣。

咱學校的海墘仔，佇舊曆四月這當中，開始有足濟種的物仔通仔掠、通仔挽，老師講等天氣好，海水洘流的時陣，伊才欲?阮去澳仔角遐行行看看咧！

南方澳買魚進階練習 – 定置網漁法篇    游冠軍2023.4.02

餐廳王老闆(以下簡稱王): 阿超啊! 恁阿伯（的漁船）這馬猶釣有馬加無?

阿超哥(以下簡稱超):昨昏有，今仔日無。

王: 昨昏釣偌濟 ? 大尾小尾?

超:昨昏釣6尾，攏大尾的，逐尾都超過四公斤。

王:今攏都賣了了去矣?

超:昨昏猶沒中晝，就攏去予買去矣…

王:攏無先留兩尾仔予我?!

超:頭家你若確定欲要，看欲愛幾尾，後遍若有釣著，我才隨敲手機仔共跟你講.

王:好，後遍恁若釣有馬加，毋管大細尾，我攏總買。

超:好，到時，我會共你留起來。

王:今仔日，猶閣有啥物魚仔通做さしみ的?

超:頭家你共看.這馬遮的攏早起才掠起來的，逐尾嘛攏會使刣さしみ!

王: 早起掠的? 敢有影?

超:這就東澳遐的“煙仔空”(定置網)掠的，拄才撈起來的

。你共看! 青苔魽、瓜子魽、紅目魽、牛港、虎頭魽，逐尾嘛金鑠鑠!

王:遮的我攏欲買，先共秤看攏總多少，毋免殺，阮家己會處理，我隨叫人開車馬上來載。飛烏虎今較少矣的款?

超:頂個月就攏掠無啊，若愛，可能要等七月看有無!

西魯肉 — 宜蘭手路菜介紹01      2023.03.29 游冠軍

頂禮拜台語課，大家講到過年期間的活動，嘛有講到過年每一个人兜，攏會家己做豐沛的料理佮點心。今仔日咱來繼續介紹宜蘭的手路菜，手路菜佇咱平時定煮常定食的菜無仝，每一項手路菜攏有伊的故事，嘛有伊家己特別的味道。佇煮手路菜的時，配料佇放，袂使傷凊彩，需要遵照一寡傳統，佇煮的人，家己本身嘛愛有一寡功夫，才煮有路來。

認捌宜蘭的手路菜，會予咱更加了解宜蘭的文化佮歷史，嘛對宜蘭的特產，佮環境特色，有閣較深的感受。今仔日欲講的手路菜，號做「西魯肉」。這項菜的上源頭，是佇以早的農村。彼當陣，逐家都較散，若有客人來厝裡面食飯，主人厝裡面若拄好無豬肉、雞肉通請人客，就會闔幾粒仔雞蛋，閣共抐抐一下，倒落去熱油底烰，烰到酥酥香香時才共撈起來。才閣用蝦米、香菇芡芳，下水，下寒天上大出的冬北仔，等這坩湯滾起來了後，才共拄才烰好的蛋酥，下落去。這坩湯裡面，雖然干焦有冬白仔，佮幾粒蛋爾爾，但是佇啉當中，一直有蛋酥發出來的芳氣，予人啉起來足像肉湯。後來，逐家經濟愈來愈好，要煮湯請人客食，湯內底當然會囥真濟好料。毋過，逐家猶原會懷念以早，燒湯裡底那種冬白仔菜佮蛋酥，濫做伙的香氣佮口味。

「西魯肉」這路菜是按怎會號做西魯肉？「西魯」是日語「湯」的意思，西魯肉的「肉」，是佇講蛋酥發出來的肉味。所以講，西魯肉這路菜的傳統原味，湯頭一定愛有大白菜佮蛋酥的味，然後才閣加其他的配料。到底愛下佗幾項配料? 其實攏是予煮的人自己去安排。佇蘇澳地區，西魯肉裡面會下真濟海產，若佇較講究的人兜，西魯肉裡面會下魚翅、海參、鮑魚，各種較貴的配料。

西魯肉愛按怎煮較好吃? 冠軍老師感覺這路菜的好吃，秘訣是在芡芳，蝦米先芡芳，等蝦米芳氣走出來，才閣下香菇落去芡芳，等這兩項的芳味攏走出來，才下其他配料落去炒，配料攏總炒芳了後，才閣下水開始?，等湯滾起來了後，才下冬白仔，繼續?十五分鐘，才切做細火，若欲先食，切細火了後就會使食矣。食進前，愛會記咧共拄才烰好的蛋酥，下落去規坩的西魯肉頂面，這路菜蔬到遮就算完成矣。

西魯肉有真濟宜蘭人對家鄉的感情，宜蘭人每一擺食西魯肉，攏會想起過去，真濟以早隨人的人生經歷、故事。 以早教冠軍老師北管的一位阿公捌講過，宜蘭的北管，曾經嘛有一段故事，跟西魯肉有關係。是啥麼故事? 就等有時間，才請冠軍老師講給咱聽。

滷肉飯的肉燥 – 宜蘭家常菜系列      游冠軍2023.3.20新編

今仔日咱閣來介紹另外一路料理 – 攪滷肉飯的肉燥。這項料理真適合現代人的生活，因為現時的社會，逐家攏真無閒，若有欲家己煮三頓，就愛選緊又利便的料理方式。厝裡面若有先滷一坩肉燥起來，欲食飯前，共熥乎燒，淋佇燒飯頂，就會使食幾若碗飯矣。若欲食甲較有營養，會使閣簡單煮一个清湯，煠一个青菜，按呢，保證大人囡仔攏食甲歡喜閣滿足矣。

肉燥的芳氣佮口味，主要是對紅蔥頭來的，紅蔥頭跟大蔥頭、蒜仔、蔥仔無仝，伊有家己特殊的氣味。一般咱佇做料理，攏會先共伊佮豬油下做伙芡芳，抑是共烰做紅蔥酥。佇咱台灣的傳統料理當中，紅蔥頭是真濟項料理佇咧芡芳的時，一定愛有的主角。紅蔥頭芡芳了後，才下絞肉落去炒，絞肉愛先要剁好，若嫌傷費氣，嘛會使央豬肉砧的頭家鬥相共，?有專門佇絞肉的機械，咱先共豬肉買好，才請頭家用機械共豬肉下落去絞就可以了。

絞肉炒芳了後，下豆油、米酒、水，才切細火煮一點鐘，芳閣利口的肉燥就完成矣。每一个人兜的口味攏無仝，有的較愛下糖落去滷，聽講滷起來的肉燥較金，嘛較袂死鹹。冠軍老師建議逐家，毋管有欲下糖抑無，滷肉燥上重要的是材料愛好，豬肉若揀媠閣鮮的三層仔肉，豆油也揀好的正豆油，滷出來的肉燥，絕對芳閣甜。便菜飯仔的料理，雖然簡單，但是嘛愛共煮予好食。煮食的鋩角太濟，咱一世人學袂了，毋過若是逐項材料攢有夠，攏閣講究鮮佮媠，料理自然就好食。

對話練習 — 漁港買魚第二篇
買魚阿嬤:頭家! 這當陣.食啥物魚仔上好?
賣魚阿順:食巴郎上著時，這馬巴郎開始大出。今仔日掠有
夠濟的! 阿嬤你共看，對八點到今，我已經賣五篩
去矣。這馬賰遮的爾爾，若無緊買，等呢就去予人
買了去矣。
買魚阿嬤: 逐尾看起來攏金爍爍，毋過，巴郎我較罕得煮。
賣魚阿順: 阿嬤我共你講，這款魚仔看你是欲炊、欲煎攏好
食，啊若人彼日本料理店閣較厚工，攏用烘的，烘
的有影盡好食。
買魚阿嬤:會盡厚刺無? 我驚阮孫袂曉食，去予刺鑿著。
賣魚阿順:這你放心! 巴郎無啥刺，干焦尾的位較有刺，愛
略仔注意，若真正遐驚刺，咱通揀較大尾的。
買魚阿嬤:頭家，你共我揀兩尾較大尾的，才共秤看覓!
賣魚阿順:好! 這兩尾好無?
買魚阿嬤:這兩尾敢有肥?
賣魚阿順: 巴郎這馬當著時，逐尾嘛肥閣甜。
秤起來拄好八十。
買魚阿嬤:好! 無就先買這兩尾轉去煮看覓!
賣魚阿順:好! 阿嬤小等我一咧! 我共刣oo好，愛冰角無?
買魚阿嬤: 毋免! 我連鞭隨欲煮。
賣魚阿順:來! 阿嬤這你的! 愛閣找你二十。有閒才閣來啦!
買魚阿嬤: 好! 我先來轉喔!

對話練習 – 漁港買魚01    游冠軍新編2023.03.24 

賣魚阿順: 來喔~  參考看覓喔~ 今仔日煙仔虎、

巴浪、馬加、花煙…攏現撈仔的!

阿媽:飛烏虎有無?

賣魚阿順: 今仔日無，別種好無?

阿媽:馬加按怎賣?

賣魚阿順:一公斤兩百!

阿媽:這尾共我秤看覓!

賣魚阿順:這尾四啊二，共你提四百就好! 欲按怎刣?

阿媽:我欲做さしみ，麻煩頭家共切做兩爿。

賣魚阿順: 愛冰角無?

阿媽: 愛! 才麻煩你!

賣魚阿順: 來! 阿媽.你的好矣!

阿媽:歹勢!  我煞無紮零星的，一千箍予你找…

賣魚阿順: 無要緊!  我找你六百!

阿媽: 多謝你!

賣魚阿順: 莫客氣! 若食有佮意，

才較捷來共阮交關啦 !

香菇煮醬油 – 宜蘭便菜飯料理系列  游冠軍2023.02.12重撰

頂禮拜咱介紹宜蘭的手路菜，今仔日換來講一寡「家常菜」(華語發音)，佇咱宜蘭較捷講的講法，「家常菜」咱台語是講「便菜飯」，意思是厝裡面定定佇吃的簡單料理。「家常菜」看起來簡單，其實逐項真足去共了解乎透，裡面有真濟在地的物產、文化、藝術，值得咱好好仔來認捌、領受。

先來介紹冠軍老師佇厝裡面，定定煮的一道菜，國語叫做「醬燒鮮香菇」，這項菜若用台語簡單說，就是共香菇下落去煮醬油。拄開始先用蒜頭芡芳一下，生的香菇切塊，下落去炒一時仔，才倒半碗的豆油落去煮，若欲煮予較軟，會使閣下半碗較少的水落去，煮到鼎底的豆油、水攏咧欲焦的時，掖一寡蔥仔珠落去，就完成這項簡單料理。

佇以早，香菇攏種佇山頂，特別是佇大同、南澳的山頂，泰雅族的做穡人上?種香菇，?愛先剉樹，共樹鋸做一枝一枝的圓樹箍，佇樹箍頂戮空，才共香菇的細菌囥進去，香菇家己就會佇較澹濕的菇棚內面，家己發出來。聽泰雅族的朋友?說，香菇佇菇棚裡面生長，咱人猶未入去採收進前，就有可能予山上的猴山仔、膨鼠先食一半去矣。毋過泰雅族的朋友，袂因為按呢，就去傷害遮的愛食香菇的動物，因為?知影遮的動物若予人消滅，其他會傷害人類閣較大的動物，就會增加出來。譬如講: 山上的膨鼠、畚塗鼠若予消滅，白蟻就會增加出來，白蟻是會共規个菇棚攏食掉的害蟲。

這款佇山區，用大枝柴箍所種的香菇，是上傳統的種法，伊的國語名號做「椴木香菇」，椴木香菇足清氣，會使生食，而且有伊家己特別的芳氣佮口味，但是因為較高價，逐家較少佇市場買到。若想欲食這種香菇，會當去山頂，直接共種椴木香菇的人買，甚至去到現場共生食看覓。向望這種傳統的香菇，袂受到「太空包香菇」的影響，繼續延續落去，予咱家鄉的好物產，永遠保存下去。