風颱上濟的舊曆七月
華文寫作: 游冠軍老師 台文撰寫: 黃登英老師 校對:黃玟錦老師
阮學校這禮拜就開學矣，對開學到這馬，天氣佮暑假仝款，攏足熱，冠軍老師有講過一句俗語：秋會曝死鰗鰡。意思就是講，秋天若熱起來會比熱天較熱。這馬拄好是舊曆七月，是風颱上濟的時陣，電視新聞不時嘛佇報，講佗位閣走一个風颱出來。風颱敢真正會走來咱台灣? 咱老祖先捌留一句俗語予咱，講：一雷破九颱。意思就是講，佇七月當中若有聽著天頂佇咧霆雷，這就表示對這馬起，風颱袂閣走來咱台灣。
過去，台灣民間佇七月的時，有足濟禁忌。「袂當去外口耍水」就是其中一个禁忌。嘛有人講七月的時，水內底有水鬼，水鬼會共耍水的人搝(giú)入去水底。所以愛等七月結束的時，所有的鬼攏關入去陰間(im-kan)了後，才會使去耍水。
冠軍老師無相信有鬼，但是伊嘛建議，七月時若有風颱接近台灣，欲去耍水的人就愛特別注意，看海湧有變較雄無? 嘛愛注意溪水有較掣流無? 若有，就愛盡量莫去水底耍水，才袂發生危險。