這個時陣買魚仔上好(一) — 蘇澳季節本海漁產系列專題
初稿: 游冠軍 2022/11/07
逐年由新曆十月開始，咱蘇澳本海開始掠有盡濟秋天的魚仔。國語講的〝鬼頭刀〞，咱台語講號做〝飛烏虎〞，佇這馬開始大出，南方澳仔的魚丸工廠，會提這馬掠的飛烏虎來做魚丸，因為這馬拄好是飛烏虎當咧生湠的時陣，肉上油，肉有油才會使做魚丸。所以飛烏虎嘛無人共叫做〝秋虎〞。
咱遮的討海人是按怎掠飛烏虎的? 大部分攏是放kún掠的，放kún就是國語講的〝延繩釣〞，用一條較粗的母線，下跤閣綁一條一條較幼的魚線和魚鉤，等魚仔家己來咬餌。放kún掠的魚仔，若佇海水猶未搝起來，有當時仔會去予別的魚仔咬著，身軀就有傷痕，較無好看。所以若是煙仔空掠著的飛烏虎，會比放kún掠的較好價。
日本人號魚仔名，定定會用華語「鰺」這個字，譬如講有「雙帶鰺」、「真鰺」、「藍圓鰺」、「大馬鰺」…，若是佇咱蘇澳，咱嘛有家己的號名，盡濟學名叫「鰺」的魚仔，咱攏號做「甘」，譬如講咱蘇澳秋冬的時，定定掠有「紅甘」「青甘」、「白甘」、「黑甘」、「虎頭甘」、「瓜子甘」、「鳅甘」、「紅目甘」、「青蜞甘」…，到底攏總有幾種甘? 聽南方澳的老歲仔人說，蘇澳本海掠會著的，有超兩百外種的甘。號名「甘」的魚仔食起來攏足甘甜的，由這馬開始到過年(舊曆)後，咱蘇澳本海的「甘」開始大出，所以這個時陣，來南方澳仔買魚上好。