做大水的宜蘭秋天 (宜蘭風雨、水災俗語專篇) 初稿:游冠軍2022.10.15
以早老師捌講過，宜蘭佇秋天攏會做大水，做大水就是連紲落雨幾若工、規禮拜、幾若禮拜，造成圳溝抑是較低的所在的水，攏滇起來，淹到車路、田園、運動埕，造成一寡災害。其實，對囡仔來講，做大水毋但袂感覺艱苦，閣足好耍。
咱宜蘭由以早就盡重視水土保護，山區盡罕得受到非法的開發，所以佇做大水的秋天，真罕得發生過重大的災禍。毋過，咱猶原愛保持警覺，若拄著落大雨，抑是連紲落雨的天氣，就盡量莫去溪埔耍，嘛盡量離山崎、山崁較遠一寡，才不會發生意外。
咱宜蘭規年迵天攏厚雨水，由以早就有流傳真濟俗語，佮咱宜蘭的落雨天、做大水有關係，「龜山戴帽，大水浩浩(hō)」、「龜吐磺(hông)」、「三四五陳雷斷湧吼，七八九雷斬錠(tiānn)走」「九月颱，無人知」、「水崩崁仔腳──王公走代先」「塭仔底割稻仔──爬龍船」、「柯仔林作大水──無壩」「前堀後堀，拜拜家己囫」…，遮的俗語，有的充滿先民的智慧，有的背後有足心適的故事，足值得咱來好好仔欣賞。
老師講，這十幾年來，地球環境受人類破壞，咱宜蘭的氣候嘛已經佮過去無仝款矣。落雨的時間變愈短，落的雨變愈大滴、愈雄(hiông)，造成盡濟農作物無法度好好生長。秋天已經不像以早的秋天，變甲愈漚翕，予人感覺真刺疫。所以講咱「人若無照天理，天就毋照甲子」，向望逐家攏同齊來愛惜咱的地球，保護咱的自然環境。