全新的繁體中文 WordPress 網站《宜蘭部落格教育平台 網站》
《十一月冬至，十二月尾牙》
作者：游冠軍 老師 台文撰寫：黃登英 校稿：黃玟錦
俗語講：十一月冬至，十二月尾牙，進入舊曆十一月了後，逐家就開始佇想年節仔的代誌。咱南方澳仔的魚仔嘛愈捉愈濟，白帶魚、飛烏虎愈捉愈大尾，馬加、花煙嘛開始有矣。
冠軍老師以早捌講過，等天氣真正冷落來了後，伊欲煮幾項仔宜蘭手路菜請阮逐家食。今仔日伊介紹其中一項，是咱宜蘭人佇請人客的時常會煮的手路菜。這路菜號做鰇魚螺肉蒜，煮這項料理愛先攢(tshuân)一寡材料，鰇魚愛買阿根廷的鰇魚，啊那螺肉就要去傳統的 kám仔店，買彼款專門佇煮湯的螺肉罐頭，蒜仔就愛買咱宜蘭本地的蒜仔。
鰇魚先浸水二十分鐘了後，共切做一塊一塊，囥入去熱油內底煏piak，煏共有香味走出來，表面略仔酥酥，才共螺肉罐頭共倒落，罐頭內底的湯佮牙攏愛予落，下(hē)一寡水，用大火煮，煮滾了後，才共已經切做一橛一橛的蒜仔，攏共囥落去，禁火，這項料理都（to）完成矣。冠軍老師講這馬蒜仔傷貴，愛等蒜仔開始大出，較俗了後伊才欲煮予阮食。
種在沙仔地的宜蘭菜頭(一) 本地蔬菜農產專題 – 岳明中小學自撰台語主題討論用文章 初稿:游冠軍
最近一直落雨落袂煞，若有閬，上加閬(làng)幾點鐘仔，就閣繼續落，毋但人咧欲起痟，農作物嘛損失真濟，學校邊的菜園，所有青菜都欲死了了矣，賰番薯葉仔猶沒死爾。
冠軍老師捌講過，宜蘭的菜蔬定定因為連紲沃雨傷濟工，造成產量無穩定，普通時，攏愛靠南部的出產送過來咱遮，咱才有充足閣齊全的菜蔬通買賣。毋過，有幾a項菜蔬，是孤干焦咱宜蘭本地種出來的，才真正好吃。譬如宜蘭的蔥仔、蒜仔的口感佮氣味，是別位種袂出來的。這馬咱特別來講咱宜蘭的菜頭，咱宜蘭的菜頭開始大出了後，攏比南部的菜頭較好價，逐家都愛吃宜蘭的菜頭，別位的菜頭無像宜蘭的菜頭遐芳，嘛無宜蘭菜頭的甜，食起來嘛無咱宜蘭的幼。雖然最近咱宜蘭足濟菜頭去予雨水沃死去，毋過宜蘭的菜頭會好吃，真有可能佮雨水有關係，宜蘭的菜頭攏佇秋天才開始種，到寒天才開始收成，這段期間就是宜蘭上厚雨的時陣，不但雨水濟，天氣閣涼冷，無的確菜頭就是愛這種環境才會甜。咱宜蘭的沙仔地足濟，海墘的沙崙、溪埔地攏是沙仔地，拄著連紲落雨，因為沙地消水較緊，種在沙仔地的菜頭就較袂死，所以宜蘭沙仔地的菜頭佇冬天，毋但大出，逐家攏愛買。
這個時陣買魚仔上好(一) — 蘇澳季節本海漁產系列專題
初稿: 游冠軍 2022/11/07
逐年由新曆十月開始，咱蘇澳本海開始掠有盡濟秋天的魚仔。國語講的〝鬼頭刀〞，咱台語講號做〝飛烏虎〞，佇這馬開始大出，南方澳仔的魚丸工廠，會提這馬掠的飛烏虎來做魚丸，因為這馬拄好是飛烏虎當咧生湠的時陣，肉上油，肉有油才會使做魚丸。所以飛烏虎嘛無人共叫做〝秋虎〞。
咱遮的討海人是按怎掠飛烏虎的? 大部分攏是放kún掠的，放kún就是國語講的〝延繩釣〞，用一條較粗的母線，下跤閣綁一條一條較幼的魚線和魚鉤，等魚仔家己來咬餌。放kún掠的魚仔，若佇海水猶未搝起來，有當時仔會去予別的魚仔咬著，身軀就有傷痕，較無好看。所以若是煙仔空掠著的飛烏虎，會比放kún掠的較好價。
日本人號魚仔名，定定會用華語「鰺」這個字，譬如講有「雙帶鰺」、「真鰺」、「藍圓鰺」、「大馬鰺」…，若是佇咱蘇澳，咱嘛有家己的號名，盡濟學名叫「鰺」的魚仔，咱攏號做「甘」，譬如講咱蘇澳秋冬的時，定定掠有「紅甘」「青甘」、「白甘」、「黑甘」、「虎頭甘」、「瓜子甘」、「鳅甘」、「紅目甘」、「青蜞甘」…，到底攏總有幾種甘? 聽南方澳的老歲仔人說，蘇澳本海掠會著的，有超兩百外種的甘。號名「甘」的魚仔食起來攏足甘甜的，由這馬開始到過年(舊曆)後，咱蘇澳本海的「甘」開始大出，所以這個時陣，來南方澳仔買魚上好。
阿嬤教我煮魚仔湯(上) 游冠軍老師新編2022.10
孫：阿嬤… 我想欲喝魚湯
嬤：好.. 阿嬤教你按怎煮魚仔湯
孫：耶… 多謝阿嬤
嬤：你先去共冰箱裡底，頂改刣さしみ賰落下來的魚仔肉，攏先提出來退冰。
孫：好.. 我知! 阿嬤.這魚肉?硞硞.愛退冰退到當時?
嬤：揣一个銅鼎仔， 貯水，共魚肉囥入去水內底浸，按呢退冰才會緊。
孫：阿嬤. 銅鼎仔提來矣!
嬤：我叫你提鼎.你提桶仔來要創啥? 銅鼎仔就是「鍋子」啦…
孫：好!我知! 阿嬤!銅鼎仔貯水.魚肉嘛囥入去矣! 閣來欲做啥?
嬤：愛來燃水、切薑絲。你閣去提一个較細跤的銅鼎仔，洗洗了後，共貯半鼎的水。
孫：來矣來矣!
嬤：共囥去咧灶頂，開大火，鼎蓋要先蓋去咧。
孫：阿嬤.火怎會戛袂著?
嬤：敢會無瓦矣? 我戛看覓.. 啊!真正沒瓦斯. 你先去敲電話叫瓦斯。
孫：好… 喂! 咱遮是毋是瓦斯行? 阮遮是嶺腳140號. 欲叫一桶大桶的.
瓦斯行:歹勢.. 阮今仔日拄好休息咧… 明仔載共你送，好無?
孫：蛤? 袂使啦.我今當佇煮魚仔湯.這馬隨愛瓦斯咧!
瓦斯行:無按呢啦! 我敲電話叫馬賽 “大箍仔”去共你送!
孫：好啦… 差不多當時會到?
瓦斯行:若順序，差不多十五分鐘會到.
若有啥物狀況，無才調送，我才打手機共你講!
孫：好啦.. 你若敲..就敲這馬這支號碼. 頭家! 按呢就拜託你矣!
嬤：瓦斯有叫著嗎?
孫：有! 十五分鐘會送來!
嬤：好! 趁這个時陣，咱來切薑絲。
孫：我知! 我來去冰箱提薑… 阿嬤!薑洗好矣，我來切薑絲。
嬤：等一下! 你攑這支刀，是さしみ刀.欲切薑，歹切! 去換菜刀來!
孫：好! 我攑這隻菜刀來切!
嬤：等一下! 你按呢切，會切著手。 阿嬤共你講，拄開始先切做兩爿.提其中一爿.共平的彼面，倚佇砧頂。 按呢切，薑就袂翱翱輾矣.按呢較袂切著手。
孫：好..我試看覓!
食家己牽罟掠來的魚仔(下)
作者：游冠軍 老師 台文：黃登英 校稿：黃玟錦
阮牽罟掠的彼(he)四尾大魚，予冠軍老師紮轉去冰了後，第二工伊丟隨(suî)煮予阮看，伊甲紅沙佮尖梭攏先切做兩爿，嘛共虱目仔的魚肚先搧(siàn)落來，閣共豉(sīnn)鹽，過一時仔了後著共囥(khǹg)入去鼎（tiánn)底煎。賰(tshun)落來的魚頭魚骨，較有刺的部份，都攏囥入去另外一坩(khann)銅鼎底煮湯。因為這四尾魚仔是阮家己對海底掠起來的，所以煮好了後，阮逐个攏食甲特別歡喜。
這馬已經進入舊曆十月矣，天氣愈來愈涼冷，毋過冠軍老師伊刁工(thiau-kang)招阮去學校邊仔的水埤仔耍水，伊講若有落來浸水，伊欲煮魚仔湯請阮食，結果逐家攏蹽(liâu)落去矣。水岸邊干焦幾个同學，因為進前有著傷，驚空喙 (khang-tshuì)發炎，所以無落去(lueh)耍。冠軍老師伊講，遮埤仔水，攏是對(uì)埤仔底濆(bùn)出來的出泉水，浸愈久皮膚會愈滑溜。阮逐家耍共歡喜甲呢，有幾若个同學已經浸水浸共懼懼顫 ，猶閣毋甘起來換衫。 到尾仔，欲到中晝矣，老師催逐个去洗身軀(sué-hun-su)換衫，準備欲轉去學校食飯。
老師講今仔日逐个攏毋驚水冷、勇敢落去浸水，所以後禮拜伊欲閣煮一擺魚仔湯予逐个啉。
食家己牽罟掠來的魚仔（上）
華語作者：游冠軍 台文撰寫：黃登英 校稿：黃玟錦
最近一直落雨，下晡時已經無像進前遐爾漚翕矣！
日時仔的時間愈來愈短，就親像古早人佇講的：「九月狗爁（nah又唸作nà）日」。進入舊曆九月了後，下晡袂到五點，天都已經烏嘛嘛矣。
頂禮拜，老師?阮去外澳仔?迌，有一个單位來共阮接接(tsih-tsiap)，伊安排阮到海邊仔牽罟，其實阮以早嘛捌佇學校邊仔看人牽罟、嘛捌綴人罟掠過。但是這擺牽罟是干焦安排阮佮隔壁的同學(tông-ha̍k)同齊牽的，牽著的魚仔攏會使予阮紮轉去食。
四五个阿公阿嬤，對(uì)阮這爿的海沙埔，駛竹排仔到海面上，一面駛，一面共網仔放落海底，踅半箍了後閣駛轉來海沙埔。阮和隔壁班的，一班搝(giú)一爿，阮搝左爿的大索仔，另外一班搝正爿的大索仔，逐个攏搝共喘怦怦。
阮攏地想講這改掠著的魚仔，應該攏是細尾魚仔，想袂到這改有掠著兩尾大尾的虱目仔（魚），一尾大紅沙，閣有一尾大尖梭。冠軍老師隨共這个魚仔用橐仔（lok-á）橐起來，伊欲共魚仔載轉去學校冰箱冰，伊講明仔載欲煮這四尾魚仔予阮食。
做大水的宜蘭秋天 (宜蘭風雨、水災俗語專篇) 初稿:游冠軍2022.10.15
以早老師捌講過，宜蘭佇秋天攏會做大水，做大水就是連紲落雨幾若工、規禮拜、幾若禮拜，造成圳溝抑是較低的所在的水，攏滇起來，淹到車路、田園、運動埕，造成一寡災害。其實，對囡仔來講，做大水毋但袂感覺艱苦，閣足好耍。
咱宜蘭由以早就盡重視水土保護，山區盡罕得受到非法的開發，所以佇做大水的秋天，真罕得發生過重大的災禍。毋過，咱猶原愛保持警覺，若拄著落大雨，抑是連紲落雨的天氣，就盡量莫去溪埔耍，嘛盡量離山崎、山崁較遠一寡，才不會發生意外。
咱宜蘭規年迵天攏厚雨水，由以早就有流傳真濟俗語，佮咱宜蘭的落雨天、做大水有關係，「龜山戴帽，大水浩浩(hō)」、「龜吐磺(hông)」、「三四五陳雷斷湧吼，七八九雷斬錠(tiānn)走」「九月颱，無人知」、「水崩崁仔腳──王公走代先」「塭仔底割稻仔──爬龍船」、「柯仔林作大水──無壩」「前堀後堀，拜拜家己囫」…，遮的俗語，有的充滿先民的智慧，有的背後有足心適的故事，足值得咱來好好仔欣賞。
老師講，這十幾年來，地球環境受人類破壞，咱宜蘭的氣候嘛已經佮過去無仝款矣。落雨的時間變愈短，落的雨變愈大滴、愈雄(hiông)，造成盡濟農作物無法度好好生長。秋天已經不像以早的秋天，變甲愈漚翕，予人感覺真刺疫。所以講咱「人若無照天理，天就毋照甲子」，向望逐家攏同齊來愛惜咱的地球，保護咱的自然環境。
舊曆八月的秋天
華語原作：游冠軍老師 台文撰寫校對:黃登英老師、黃玟錦老師
這馬已經是八月矣。咱家鄉有一句俗語講：二八月亂穿衣。意思是講八月時，因為天氣連鞭寒、連鞭熱，所以咱人穿衫嘛會連鞭短䘼、連鞭長䘼。
咱宜蘭傳統的農村較無佇八月十五中秋節，毋過若講著咱定定佇食的中秋餅，其實佇咧過去，嘛分足濟種(tsióng)的，有平西餅、有膨餅、嘛有大餅，猶閣有咱這馬較捷食的『蛋黃酥』（華語），號做「卵仁酥」，猶閣一種這馬真流行的『廣式月餅』（華語）。
若講著海產咱南方澳仔對(uì)這馬八月開始，較大出的有花飛、巴浪、白帶魚、鯊魚，若花飛咱本海佇掠的，主要是「烏目蕊仔」這種；嘛有「白肚仔」，但是較少(tsió)；巴浪這馬是「鳥尾巴浪」較濟。
咱這个舊曆八月，實在是一个物產豐富，天氣多變的月份。
風颱上濟的舊曆七月
華文寫作: 游冠軍老師 台文撰寫: 黃登英老師 校對:黃玟錦老師
阮學校這禮拜就開學矣，對開學到這馬，天氣佮暑假仝款，攏足熱，冠軍老師有講過一句俗語：秋會曝死鰗鰡。意思就是講，秋天若熱起來會比熱天較熱。這馬拄好是舊曆七月，是風颱上濟的時陣，電視新聞不時嘛佇報，講佗位閣走一个風颱出來。風颱敢真正會走來咱台灣? 咱老祖先捌留一句俗語予咱，講：一雷破九颱。意思就是講，佇七月當中若有聽著天頂佇咧霆雷，這就表示對這馬起，風颱袂閣走來咱台灣。
過去，台灣民間佇七月的時，有足濟禁忌。「袂當去外口耍水」就是其中一个禁忌。嘛有人講七月的時，水內底有水鬼，水鬼會共耍水的人搝(giú)入去水底。所以愛等七月結束的時，所有的鬼攏關入去陰間(im-kan)了後，才會使去耍水。
冠軍老師無相信有鬼，但是伊嘛建議，七月時若有風颱接近台灣，欲去耍水的人就愛特別注意，看海湧有變較雄無? 嘛愛注意溪水有較掣流無? 若有，就愛盡量莫去水底耍水，才袂發生危險。
舊曆五月十六大流洘 作者：游冠軍 台文：黃登英 校稿：黃玟錦
這禮拜的節氣，是對芒種(bông-tsíng)進入到夏至，咱宜蘭四界的水田，攏會使看著規欉的稻仔對著穗一直飽仁起來，規片田望過去，已經對草仔色反做深黃色矣。
頂禮拜二拄好是咱遮的海墘仔大流的時陣，冠軍老師央陳阿伯?咱規班的囝仔，去海墘仔黜(thuh)tshián-tshuann—á(笠螺)，順紲挽一寡仔海菜。陳阿伯自細漢就佇咱嶺腳遮大漢，伊講這改的大流，海水會退一百公尺，這款大流洿一年才兩擺爾爾。 阮先綴冠軍老師行落去海沙埔，那行那看海水，阮看著海水退去了後，海沙埔有足濟窟仔一直浡清氣水出來，冠軍老師講這款清氣水毋是海水，是清氣冰涼的山溪仔水，伊講以早伊定定佇海沙埔耍水，無意之間才發現著這个秘密，原來宜蘭倚山的海墘，一直攏有山溪仔水對海底浡出來。
行到澳仔角的洿流底，陳阿伯已經黜規仔粒大粒的tshián-tshuann–á落來矣，冠軍老師用一跤橐仔共貯起來，紲落去換阮規班的同學落去黜，冠軍老師講：黜起來的tshián-tshuann—á，欲共豉豆油，做一項足利口的小菜。
結果海水退甲一百公尺的洿流底，上濟的毋是tshián-tshuann—á，是紅頭螺，逐个看著遮濟大粒的紅頭螺，對黜tshián-tshuann–á就開始沒心沒情(tsiânn) 矣，一个一个攏蹽落去撿紅頭螺。這逝，陳阿伯?阮來洿流底，予阮捉著太濟平常時足罕得看的動物仔，有刺膽、花鮡(hue-thiâu，礁岸的彈塗魚)、蠘仔、蟳仔、刺螺、蟯仔(giô-á)、海蜈蜞…。
阮逐个攏耍甲毋甘離開，但是老師講海水已經開始佇飽流矣，若無趕緊起來，閣過一睏仔就看袂著水底的石頭，到時若欲peh起來岸頂就較會跋倒，所以為著顧安全，逐家攏趕緊起來，佮老師做伙行轉去學校矣。