台語台羅家己錄的聽寫練習

台羅聽寫練習。初學的人建議先對台語聽寫練習網站練習，一个詞唸三擺，五个詞了後顯示答案。先練習一段時間了後，再閣來練習下跤的20詞，較袂壓力傷大。

學台羅有一段時間矣，我本底是用台語聽寫練習網站練習。伊蓋好用哦，尤其對初學者來講，字無困難，發音是教典的發音，足清楚。一个詞唸三擺，唸五个詞，馬上會顯示答案，看家己的台羅抑是漢字敢有寫毋著？符合教育原理講的「立即回饋」。一擺五个詞，壓力袂傷大。

是說伊的字偏簡單，我想欲揣略略仔較倚台語專用漢字的材料來練習，譬喻講：漉喙、屧貼、雺霧、坱埃… 這款的聽寫網站就罕咧看著。

另外，老師吩咐阮愛做「訂正簿」，毋過我定定是記佇雲頂?碟(雲端硬碟，教典無收，我家己烏白炸tsuànn)。累積的字詞毋但是毋著的字詞，猶閣有伊的相關詞，譬論講，用「?貼」揣教典的時陣看著「揜貼」「屧貼」，我嘛順紲抄起來。落尾手閣想講「敢會使有人唸予我聽，我通好聽寫？」既然這款聽寫網站僫(oh4)揣，抑無殘殘豆乾切五角，咱家己來錄音耍看覓，所以開始有這个網頁。

我分做二款錄音方式，一款是五秒唸一詞，我欲家己測驗是不是聽著台語會曉寫漢字？對咱學華語遮爾久的人來講，頭腦內底有字應該就寫會出來。三不五時我就點出來聽，二分鐘的時間就會使複習一擺。另外一款是20秒內底唸三擺，這是欲練習寫台羅。頭前有格仔紙摻答案的檔案，會使下載列印做練習紙，馬上知影著幾條？（按呢你講好毋好啊～～）

人講「毛毛仔雨落久，塗嘛會澹」，「捷做手袂鈍，捷講喙會順」加練習，練久就會熟手，我家已嘛加一寡練習口語的機會。

是講，這是我家已佇厝裡錄的，阿伯北部腔的銅管仔聲，有時仔閣透濫著外口的 oo33 too55 bai51 聲，逐家莫見怪。