充電頭愛用孤空

類似頂懸相片內底的充電頭可能逐家攏有咧用，這款頭是36W，充電較緊，普通的頭差不多是5W抑是12W，充電較僫。這款頭有兩空，一空是 USB-A ，一空是 type-c ，我最近發現若欲達到伊上大港(káng)上強的充電電流，干焦會使插一空，而且定定是 type-c 彼空較強。

愛閣強調「干焦會使插一空」的意思是，干焦會使插一條充電線，另外彼空袂使插任何線，就算講干焦插線無咧充電，按呢嘛袂使，可能是充電頭會自動撥一寡電去予二空用，按呢就袂當達到上懸的電流，拍損是袂拍損，充電時間拖較長爾爾。不而過，咱專工去買這款頭就是愛伊充電緊矣啊，若充電無緊就無彩工矣，敢毋是？

這是我家己無專業的試驗心得，予逐家罔參考，祝逐家虎年大葩火。

俗語練習一：緊紡無好紗，緊嫁無好大家。比喻欲速則不達。
俗語練習二：三代粒積，一代窮空。Sann tāi lia̍p-tsik, tsi̍t tāi khîng-khong. 比喻創業艱辛，守成要謹慎。

註：這个「窮」就是「窮菜尾」的「窮」；「物件窮窮咧」的「窮」，有「收捨」的意思。

問題一：「大葩火」這種講法，敢有誠普遍？
答：並無「大葩火」這種講法，應該是「大葩尾」。
問題二：上大 káng ，應該是啥物字？
答：港。教典：計算流體的單位。例：一港水真大港。Tsi̍t káng tsuí tsin tuā káng. (一道很大、很強的水流。)；門口一港風真冷。Mn̂g-kháu tsi̍t káng hong tsin líng. (門口一道風很冷。)
問題三：寫毋著字的所在，共我講一下，多謝。

多謝黃耀庭老師提供資料。