佇 Google Meet 欲按怎共聲音送出去予逐家？

若是有用 Google Meet 佇線頂上課，定定有需要共聲音送出去，猶毋過嘛是定定袂成功，這是啥物原因？我小解釋一下。解釋進前，逐家愛知影遮是佇咧 chrome + google meet 的情況下的說明，若是用別款軟體就無仝哦。

首先來講「分頁」。看下跤的圖，你就知影啥物是「分頁」。而且欲分享聲音出去的時陣，一定愛用「分頁」。

頂懸的圖愛注意下跤彼个「分享分頁音訊」，愛共勾起來。按呢聲音才會當送出去。

結論就是，
1.先共彼个欲出聲的分頁開乎好(←遮个動作誠濟人袂記咧做)
2.愛用「分享分頁」。

另外有一款情形：譬喻講欲共電腦硬碟內底的 mp3 抑是影片放予逐家聽逐家看，這時陣著愛另外開一个 google meet ，莫用「加入」，請你刁工用「分享螢幕畫面」，才閣選「整個螢幕畫面」，圖面下跤彼个「分享系統音訊」嘛愛勾起來，按呢才會有聲音送出去。這款情形有較複雜，定定攏是人愛佇邊仔，那操作那解釋才會清楚。這馬姑不而將，逐家看圖凡勢會較清楚。