教育部閩南語700字詞mp3、excel檔及雙面列印PDF

這是真平出版社的一本有關閩南語認證的冊「臺灣閩南語語言能力認證考試：B2中高級武功秘笈」，網站內底有一寡mp3咱會使提出來利用。

https://jen-pin.com.tw/news_intro.php?id=148  這个連結愛記起來，抑是直接儲存佇「書籤」「我的最愛」，較袂拍無去。

仝款，看下跤的圖較清楚。

請看「1.臺灣閩南語推薦用字700字詞表」彼个部份。
伊共700字分做7段錄音，一段100字，唸予咱聽，順絀加一二句造句(原本的700字並無造句)。一段差不多是20外分鐘，我的運用方法是：先共mp3攏總下載落來囥佇電腦內底（抑是囥佇手機仔內底嘛是會使）。練習的時陣分三个階段：
頭一階段、放mp3出來聽，佮700字的冊做伙看，徛算講(也就是)聽聲兼看冊，按呢會當學字按怎寫。
第二階段、干焦聽mp3，家己寫字出來，敢若細漢時老師共咱「聽寫」彼咧形。
第三階段、較懸級，放mp3出來聽，家己佇心肝內寫字，看是不是逐字攏會曉寫？

我特別推薦這寡mp3是因為遐是專業的人用專業的器材錄的，錄音效果較好，講話的聲誠清氣無雜音。佇 youtue 頂懸嘛是有熱心的人一段一段唸予咱聽，不而過定定會聽到錄音器材沙沙的聲，聽起來有較礙虐(gāi-gio̍h)。
這錄音內底逐條攏有講第幾條，咱若袂曉的時陣就佮號碼記一下，倒轉去揣冊，嘛是真方便。

閣來，因為700字詞彼本冊蓋大本，重錘錘，不方便紮來紮去，佳哉教育部提供700字詞字卡雙面列印版PDF，雙爿面共印出來了後，拗拗割割敆敆釘釘咧，著會使變做一本細本冊，（仝款，看下跤的圖較清楚）誠方便反來反去揣字。

字卡雙面列印版PDF連結網址我囥佇下跤。
https://language.moe.gov.tw/result.aspx?classify_sn=23&subclassify_sn=439&content_sn=58

700字詞雙面列印card-two-sided-1091202
↑會使下載

這个PDF檔案是教育部的，我會使囥佇遮予大家下載，頂面遐寡mp3屬於真平出版社，我干焦設一个連結過去，愛尊重著作權。

700字詞的 EXCEL 檔 → 閩南語700字詞 

以上予逐家罔參考。其實這攏毋是我家己做的，原始來源佇遐，毋通感謝我，愛感謝當時製作的人。

後記：有關教育部閩南語700字詞，逐家是按怎讀？老實講，我逐擺著讀甲睏去。無張持佇網路看到真平出版社做的 mp3 ，想講這可能是一个方法，我共想法做法寫佇部落格，內底閣有教育部提供的700字詞雙面列印的PDF，聽好做一本細本的冊，有淡薄仔趣味，逐家罔參考。若有看到寫毋錯字的所在，共我講一下，勞力。

開一暗的時間共彼个雙面PDF印出來，誠忝頭…隔轉工早起起來，倒手肩胛頭煞略略仔疼疼……