國賽台語(閩南語)朗讀篇目整理/Tw-Ch台文中文辭典

今仔日來紹介「國賽 台語(閩南語)朗讀 篇目整理」佮「Tw-Ch台文中文辭典」。

「台語(閩南語)朗讀篇目整理」：看名就知影是收集比賽的一寡朗讀文章，邊仔閣有真平出版社的錄音檔，毋知影按怎唸、按怎發音的人，揤一下就會使聽，加誠方便。

這寡文章的基本精神較中性，用詞有深度閣袂蓋深，譬喻110年頭一篇「為你祝福」，寫老母對囝兒的煩惱，佳哉囡仔大漢了後，家己沓沓仔會曉想，知影愛上進，老母彼款心裡的歡喜佮深深的祝福，予人感動。文章無長，不而過充滿著母親愛囝成人成材的向望。「做伙大漢，陪你老」寫餵飼狗仔人的心聲，足濟文章攏足好，無張持煞一篇一篇一直紲落去。

這个網站收集99年到110年的文章，算誠豐沛，有時間提出來罔看罔看應該是袂䆀，用聽的嘛是會感動。

頂懸圖內底，(1)是文章的PDF，(2)是錄音檔。

(3)是另外一个網站「Tw-Ch台文中文辭典」。別的網站大部份會問你是欲中文查台語，抑是台羅查台語，精確用詞抑是部份比對……揤不毋著所在就查無…這个Tw-Ch台文中文辭典誠有特色，干焦一個格仔予你寫關鍵詞，不管你用中文、羅馬音標、台文，落去撨搜揣(搜尋)，就算干焦知影語詞的一字半字嘛會使揣，揣出來的物件誠濟，包括這字有用佇啥物俗語，攏有。是不是足使人感動？

舉一个例，用「亂講」去揣，揣出來就是下面的圖。「亂講」在台語會使講「濫糝講」「亂講」「烏白講」。

若是用「烏」抑是「講」落去揣，揣出來的物件夭壽濟的濟…莫烏白試，你會驚～～

猶閣有，逐擺進入入去這个網站，伊會主動問某乜中文字詞，用台語按怎講？今仔日我看到著「想知道 蒟蒻 台語怎麼說嗎？」實在真古錐。因為好奇，我定定予伊吸引去。後逝你閣來，就會換另一个詞問你，凡勢就閣予網站唌去矣，呵呵～

認真共想起來，有誠濟人恬恬一直做實事推廣台語，這款精神予人真感心。