都市的流浪兒
《都市的流浪兒》Tōo-tshi ê Liû-lōng-jî
文夏Bûn-hā
——————————————
有時就流著珠淚
ū-sî tiō lâu tio̍h tsu-luī
這款就是阮運命
tsit khuán tsiū-sī gún ūn-miā
自細漢就來離開
tsū sè-hàn tsiū lâi lī-khui
爸母的身邊
pē-bú ê sin-pinn
雖然是百花滿開
sui-jiân sī pah-hue muá-khui
可愛的春天
khó-ài ê tshun-thinn
我心內親像冬天
guá sim-lāi tshin-tshiūnn tang-thinn
不時罩烏雲
put-sî tà oo-hûn
我就是繁華都市
guá tsiū-sī huân-huâ too-tshī
流浪的囝兒
liû-lōng ê kiánn-jî
昨暝的彼个姑娘
tsa-mî ê hit ê koo-niû
對阮有來表情意
tuì gún ū lâi piáu tsîng-ì
伊也是無依無倚
i iā-sī bô-i-bô-uá
可憐的女兒
khó-liân ê lú-jî
不過我哪通為伊
put-kò guá ná thang uī i
表明我心意
piáu-bîng guá sim-ì
無定會加添兩人
bô-tiānn ē ka-thiam nn̄g-lâng
後日的情份
āu–ji̍t ê tsîng-hūn
我就是繁華都市
guá tsiū-sī huân-huâ too-tshī
流浪的囝兒
liû-lōng ê kiánn-jî
無你的流浪生活
bô lí ê liû-lōng sing-ua̍h
親像死去彼一樣
tshin-tshiūnn sí–khì hit tsi̍t-iūnn
也有人時常對我
iā ū-lâng sî-siông tuì guá
講著這款話
kóng tio̍h tsit khuán uē
雖然是前途茫茫
sui-jiân sī tsiân-tôo bông-bông
烏暗的世界
oo-àm ê sè-kài
猶原來揣揣看覓
iu-guân lâi tshuē tshuē khuànn-māi
人生的希望
jîn-sing ê hi-bāng
我就是繁華都市
guá tsiū-sī huân-huâ too-tshī
流浪的囝兒
liû-lōng ê kiánn-jî
