媽媽我時常想你
《媽媽我時常想你》Má-mah Guá Sî-siông Siūnn Lí
文夏Bûn-hā
——————————————
若是緊緊合倚著
nā-sī kín-kín ha̍p-uá tio̍h
上下目睭皮
siōng-hē ba̍k-tsiu-phuê
我就會想起故鄉
guá tsiū ē siūnn-khí kòo-hiong
目屎流袂離
ba̍k-sái lâu bē-lī
在睏中時常夢起
tsāi khùn-tiong sî-siông bāng khí
佮你相見的景情
kah lí sio-kìnn ê kíng-tsîng
思戀阿母心悲切
su-luân a-bú sim pi-tshè
他鄉的囝兒
thann-hiong ê kiánn-jî
雖然猶未出頭天
sui-jiân iáu-bē tshut-thâu-thinn
請你也忍耐
tshiánn lí iā jím-nāi
咱母囝緣份遮薄
lán bú-kiánn iân-hūn tsiah po̍h
時常來分離
sî-siông lâi hun-lî
看世間也是有人
khuànn sè-kan iā-sī ū-lâng
比咱歹命也真濟
pí lán pháinn-miā-iā tsin tsuē
毋過看起幸福人
m̄-koh khuànn khí hīng-hok lâng
怨嘆咱運命
uàn-thàn lán ūn-miā
流浪囝兒心稀微
liû-lōng kiánn-jî sim hi-bî
漂泊他鄉里
phiau-po̍k thann hiong-lí
天頂的月娘
thinn-tíng ê ge̍h-niû
也是為阮咧可憐
iā-sī uī gún teh khó-liân
抱起著阿母的影
phō khí tio̍h a-bú ê iánn
隨風漂流過日子
suî hong phiau-liû kè ji̍t-tsí
遊東遊西度過著
iû-tang iû-sai tōo-kè tio̍h
無聊的生活
bô-liâu ê sing-ua̍h
