114年教育部臺灣台語語言能力認證頭擺的考試會佇3月初8、初9舉辦。因為咱的認證逐冬是那來那濟人相賽(sio-sè)報名，為著欲服務閣較濟的考生，教育部近年來攏有咧規劃研發電腦化測驗，佇113年8月就有對A卷開始改用電腦化測驗，今年3月初8的A卷，仝款會閣用電腦化考試。毋過3月初9的B、C卷測驗，就猶維持用傳統紙筆的方式考試。
這擺的考試全國有設18个考區、攏總63間學校鬥辦，報名的總人數有1萬7,347人，其中報A卷的有9,228人；B卷的6,608人；C卷的1,511人。按職業分類共看，猶是學生囡仔占上大面，今年有9,309人報名，占總報名人數的一半較加（53.66％）。其中16歲的紀姓高中生，舊年拄通過B2中高級，今年就欲來挑戰C卷。伊認為C卷「口語表達」的題目較無好準備，平常時仔著愛加注意時事，閣愛對相關的議題有想法，才有才調佇考試的時陣表達家己的觀點。
另外，重度視覺障礙的黃姓考生，舊年頭擺參加B卷考試，就通過B1中級，今年向望會當通過B2中高級，後日仔的確會拚閣較懸的等級。猶有其他無仝國家的考生，親像德國籍的Thomas Eduard Fliss，因為進前捌研究臺灣台語的通俗文學「歌仔冊」，利用收集資料直透接觸、學習臺灣台語，毋才這擺嘛來參加認證考試。伊閣表示講，無論是德國人抑是臺灣人，攏應該愛有母語意識，愛有意識欲講母語。
這擺的考試按算114年4月28早起9點就會開放網路查成績，114年5月19開始寄合格的證書。有關考試的重要事項日程表佮相關資訊，會當去114年度臺灣台語語言能力認證考試網站 https://ttg.moe.edu.tw查，抑是敲考生免付費服務專線0800-699566。