電火戲
《電火戲》Tiān-hué-hì
高閑至 Ko Hân-tsì
——————————————
電影叫做電火戲
tiān-iánn kiò-tsuè tiān-hué-hì
有影無聲真趣味
ū-iánn bô-siann tsin tshù-bī
不但愛用跤手比
put-tān ài iōng kha-tshiú pí
嘛靠布景佮演技
mā khò pòo-kíng kah ián-ki
辯士解說戲中意
piān-sū kái-sueh hì-tiong ì
加講減講見在伊
ke kóng kiám kóng kìnn-tsāi i
嘛著增加好效果
mā tio̍h tsing-ka hó hāu-kó
蹔地拍桌佮摔椅
tsàm-tē phah-toh kah siak-í
看著火燒紅蓮寺
khuànn-tio̍h hué-sio Âng-lián-sī
紅姑怹囝陳繼志
Âng-koo in kiánn Tân Kè-tsì
千變萬化地翻天
tshian-piàn bān-huà tē huan thinn
拍噗仔呵咾伊收妖精
phah-pho̍k-á o-ló i siu iau-tsinn
看戲人有人情味
khuànn-hì-lâng ū jîn-tsîng-bī
看著歹人硞硞指
khuànn-tio̍h pháinn-lâng kho̍k-kho̍k kí
看著無情漢發脾氣
khuànn-tio̍h bô-tsîng-hàn huat phî-khì
上台欲佮銀幕拚生死
tsiūnn-tâi beh kah gîn-bōo piànn-senn-sí
