九份仔真是好所在
《九份仔真是好所在》Káu-hūn-á tsin sī hó sóo-tsāi
高閑至Ko Hân-tsì
——————————————
臺灣算來囉是寶島啊哩
Tâi-uân sǹg–lâi–loh sī pó-tó–ah-lih
陽光大地啊是九份仔好啊
iông-kong tuā-tē–ah sī Káu-hūn-á hó–ah
以前遮就是小香港
í-tsîng tsia tiō-sī Sió-hiong-káng
大街小巷啊全是人啊喂
tuā-ke sió-hāng–ah tsuân sī lâng–ah-ueh
嘿有人來遮囉是挖金空啊哩
heh ū-lâng lâi tsia–loh sī óo kim-khang–ah-lih
有人來遮啊是人看人啊喂
ū-lâng lâi tsia–ah sī lâng khuànn lâng–ah-ueh
細漢佇遮是來啊出世
suè-hàn tī tsia sī lâi–ah tshut-sì
記持攏是啊落雨天咿~啊
kì-tî lóng-sī–ah lo̍h-hōo-thinn ih~ah
嘿講著金仔囉是眾人愛咿
heh kóng-tio̍h kim-á–loh sī tsiòng-lâng ài–ih
毋驚危險啊是入空內啊喂
m̄-kiann guî-hiám–ah sī ji̍p khang-lāi–ah-ueh
有人著金是趁家伙
ū-lâng tio̍h-kim sī thàn ke-hué
有人性命啊咧奉陪啊喂
ū-lâng sènn-miā–ah teh hōng-puê–ah-ueh
老爸透早囉是入空去哩
lāu-pē thàu-tsá–loh sī ji̍p-khang khì–lih
拍拚為著啊顧妻兒啊喂
phah-piànn uī-tio̍h–ah kòo tshe-jî–ah-ueh
無錢讀冊是毋啊捌字
bô tsînn tha̍k-tsheh sī m̄–ah bat-jī
向望囝孫仔啊會出頭天咿~啊
ǹg-bāng kiánn-sun-á–ah ē tshut-thâu-thinn ih~ah
出世生做囉歹命囝啊哩
tshut-sì senn-tsuè–loh pháinn-miā-kiánn–ah-lih
阿母仔叫我啊愛認命啊喂
a-bú–á kiò guá–ah ài jīn-miā–ah-ueh
認真讀冊是拚出頭啊
jīn-tsin tha̍k-tsheh sī piànn tshut-thâu–ah
毋通閣再啊攑鋤頭咿~啊
m̄-thang koh-tsài–ah gia̍h tî-thâu ih~ah
嘿九份仔真是囉好所在哩
heh Káu-hūn-á tsin sī–loh hó sóo-tsāi–lih
世界各國啊是通人知啊喂
sè-kài kok-kok–ah sī thong-lâng tsai–ah-ueh
百姓熱情是風啊景媠
peh-sènn jia̍t-tsîng sī hong–ah kíng suí
地下的黃金啊是結規堆啊喂
tē-hā ê n̂g-kim–ah kiat kui-tui–ah-ueh
九份仔過去囉是金瓜石啊哩
Káu-hūn-á kuè–khì–loh sī Kim-kue-tsio̍h–ah-lih
伊是世界啊的金窟啊喂
i sī sè-kài–ah ê kim-khut–ah-ueh
金窟銅坑是啊國寶
kim-khut tâng-khenn sī–ah kok-pó
濟少攏愛啊來顧予伊好咿~啊
tsuē-tsió lóng ài–ah lâi kòo hōo-i hó ih~ ah
