無情之港

《無情之港》Bô-tsîng tsi Hāng

林一Lîm It(土包仔Thóo-pau-á)

——————————————

異鄉的港口酒家

ī-hiong ê káng-kháu tsiú-ka

異鄉的小姐

ī-hiong ê sió-tsiá

甜蜜的初戀

tinn-bi̍t ê tshoo-luân

也是這夜就分離

iā-sī tsit iā tiō hun-lî

青色的酒杯啊

tshinn-sik ê tsiú-pue–ah

彼个小姐陪著人客

hit ê sió-tsiá puê tio̍h lâng-kheh

對阮講情話

tuì gún kóng tsîng-uē

約會港口酒家

iok-huē káng-kháu tsiú-ka

彼時的初戀

hit-sî ê tshoo-luân

小姐的甜蜜戀夢

sió-tsiá ê tinn-bi̍t luân-bāng

等醒就失戀

tán tshínn tiō sit-luân

船離開

tsûn lī-khui

雙人分離

siang-lâng hun-lî

珠淚留袂離

tsu-luī lâu bē-lī

行船的男兒啊

kiânn-tsûn ê lâm-jî–ah

也是乾乾淨淨情意

iā-sī kan-kan-tsīng-tsīng tsîng-ì

美麗的情意

bí-lē ê tsîng-ì

這款的港口愛情

tsit khuán ê káng-kháu ài-tsîng

純情啥路用

sûn-tsîng siánn lōo-īng

這時的港口愛情

tsit-sî ê káng-kháu ài-tsîng

怨嘆無路用

uàn-thàn bô-lōo-īng

阮決心放捒美夢

gún kuat-sim pàng-sak bí-bāng

今夜欲出帆

kim-iā beh tshut-phâng

無情的港口啊

bô-tsîng ê káng-kháu–ah

小姐請你毋通啼哭

sió-tsiá tshiánn lí m̄-thang thî-khàu

一切放水流

it-tshè pàng tsuí lâu

你也是流浪的人

lí iā-sī liû-lōng ê lâng

毋通來怨嘆

m̄-thang lâi uàn-thàn