愛情花
《愛情花》Ài-tsîng Hue
簡雅子Kán Ngá-tsú
——————————————
這蕊媠花敢有名
tsit luí suí hue kám-ū miâ
開佇路邊吐心聲
khui tī lōo-pinn thóo sim-siann
風吹日曝伊毋驚
hong tshue ji̍t pha̍k i m̄-kiann
向望會當有人疼
ǹg-bāng ē-tàng ū-lâng thiànn
月娘恬恬無講話
ge̍h-niû tiām-tiām bô kóng-uē
天星問伊食飽未
thinn-tshinn mn̄g i tsia̍h-pá–bē
相思孤單一跤鞋
siunn-si koo-tuann tsi̍t-kha uê
咧等有緣人行過
teh tán ū-iân-lâng kiânn–kuè
彼條紅線佇佗位
hit tiâu âng-suànn tī tó-uī
牽出感情的滋味
khan tshut kám-tsîng ê tsu-bī
春風歡喜笑微微
tshun-hong huann-hí tshiò-bî-bî
戀愛抹粉點胭脂
luân-ài buah-hún tiám ian-tsi
等待愛情限時批
tán-thāi ài-tsîng hān-sî-phue
糖甘蜜甜在心底
thn̂g-kam bi̍t-tinn tsāi sim-té
面仔紅紅煞歹勢
bīn-á âng-âng suah pháinn-sè
幸福的花飛啊飛
hīng-hok ê hue pue–ah pue
