聽雨聲
《聽雨聲》Thiann Hōo-siann
郭忠祐 Kueh Tiong-iū
——————————————
天頂斷線風吹欲佗位揣
Thinn-tíng tn̄g-suànn hong-tshue beh tó-uī tshuē
無消無息的批揣無人拆開解說
Bô-siau-bô-sit ê phue tshuē bô lâng thiah-khui kái-sueh
每一句心內話 藏佇離別雨彼暝
Muí tsi̍t kù sim-lāi-uē tshàng tī lī-pia̍t hōo hit-mê
寂寞路燈送一段遺憾萬千
Siok-bo̍k lōo-ting sàng tsi̍t tuānn uî-hām bān-tshian
多變的烏陰天雨淋風吹
To-piàn ê oo-im-thinn hōo lâm hong tshue
慢慢落的信號洩漏寸寸相思話
Bān-bān lo̍h ê sìn-hō sia̍p-lāu tshùn-tshùn siunn-si-uē
每一滴心看見 彼段有你的日子
Muí tsi̍t tih sim khuànn-kìnn hit tuānn ū lí ê ji̍t-tsí
明知袂轉來美麗情景
Bîng-tsai buē tńg-lâi bí-lē tsîng-kíng
深深將你囥佇心內面
Tshim-tshim tsiong lí khǹg tī sim lāi-bīn
聽雨聲講你早已經離開
Thiann hōo-siann kóng lí tsá í-king lī-khui
帶袂走過去留佇阮身邊
Tuà buē tsáu kuè-khì lâu tī gún sin-pinn
綿綿雨滴答滴答
Mî-mî hōo tih-tah tih-tah
心微微想著你難忘的情意
Sim bî-bî siūnn-tio̍h lí lân-bōng ê tsîng-ì
聽雨聲留戀彼年的冬天
Thiann hōo-siann liû-luân hit-nî ê tang-thinn
講好一世人永遠袂分開
Kóng-hó tsi̍t-sì-lâng íng-uán buē hun-khui
心內思慕的聲音滴答滴答響起
Sim-lāi su-bōo ê siann-im tih-tah tih-tah hiáng-khí
飛滿天記持 摻著退色的甜蜜
Pue muá-thinn kì-tî tsham-tio̍h thè-sik ê tinn-bi̍t
越頭看感情路途彼種幸福
Ua̍t-thâu khuànn kám-tsîng lōo-tôo hit tsióng hīng-hok
行袂到當初所想的結局
Kiânn buē kàu tong-tshoo sóo siūnn ê kiat-kio̍k
已經過站的愛袂閣再重來
Í-king kuè-tsām ê ài buē koh-tsài tîng-lâi
早消失踮茫茫人海
Tsá siau-sit tiàm bông-bông jîn-hái
