幸福的溫度

《幸福的溫度》Hīng-hok ê Un-tōo
江蕙Kang Huī
——————————————
予愛的月光
hōo ài ê gue̍h-kng
趕走烏暗
kuánn-tsáu oo-àm
照光坎坷路
tsiò-kng khám-khia̍t lōo
予遺憾的心
hōo uî-hām ê sim
揣回彼張希望的地圖
tshuē huê hit tiunn hi-bāng ê tē-tôo

有愛有夢的所在
ū ài ū bāng ê sóo-tsāi
就會有快樂
tiō ē ū khuài-lo̍k
請毋通袂記咱有約束
tshiánn m̄-thang buē-kì lán ū iok-sok
一定愛幸福
it-tīng ài hīng-hok

將所有依依難捨
tsiong sóo-ū i-i lân-siá
永遠記心肝
íng-uán kì sim-kuann
感恩你一路貼心的陪伴
kám-un lí tsi̍t-lōo tah-sim ê puê-phuānn

將你最後的掌聲
tsiong lí tsuè-āu ê tsióng-siann
陪我圓滿今夜
puê guá uân-buán kim-iā
離開請帶走阮的祝福
lī-khui tshiánn tuà-tsáu gún ê tsiok-hok
傷心留踮遮
siong-sim lâu tiàm tsia

面對你才知
bīn-tuì lí tsiah tsai
一句再會
tsi̍t-kù tsài-huē
到底有偌重
tàu-té ū guā tāng
越頭才了解
ua̍t-thâu tsiah liáu-kái
往事若雨
óng-sū ná hōo
心內偌毋甘
sim-lāi guā m̄-kam
有風有雨的所在
ū hong ū hōo ê sóo-tsāi
難免有失落
lân-bián ū sit-lo̍h
有悲歡離合
ū pi-huan lî-ha̍p
人生才有幸福的溫度
jîn-sing tsiah ū hīng-hok ê un-tōo

將所有依依難捨
tsiong sóo-ū i-i lân-siá
永遠記心肝
íng-uán kì sim-kuann
感恩你一路貼心的陪伴
kám-un lí tsi̍t-lōo tah-sim ê puê-phuānn

用最後的這首歌
iōng tsuè-āu ê tsit siú kua
代替阮的感謝
tāi-thè gún ê kám-siā
離開請帶走阮的祝福
lī-khui tshiánn tuà-tsáu gún ê tsiok-hok
目屎留踮遮
ba̍k-sái lâu tiàm tsia

將今夜滿心感動
tsiong kim-iā muá-sim kám-tōng
永遠記心中
íng-uán kì sim-tiong
用感恩代替惜別的悲傷
iōng kám-un tāi-thè sioh-pia̍t ê pi-siong

有你堅定阮的夢
ū lí kian-tīng gún ê bāng
毋管阮飛去佗
m̄-kuán gún pue khì toh
有你的祝福
ū lí ê tsiok-hok
我會勇敢面對未來路
guá ē ióng-kám bīn-tuì bī-lâi lōo

感謝你最後
kám-siā lí tsuè-āu
予阮滿滿幸福的溫度
hōo gún muá-muá hīng-hok ê un-tōo