春天百花開
作者: 游冠軍 老師 台文書寫: 黃登英 校稿: 黃玟錦
最近佇咱學校定定鼻有各種花芳，尤其是柚仔花佮苦楝仔花的花芳，行到佗位(tueh，tó-uī合音唸作tueh或tuē)攏鼻會著，籃球場邊仔的拍管仔草，便所墘遐坎仔頂的盬酸仔草，田岸墘的水燈香，嘛攏開花開共足旺的，所以春天真正是百花開的時陣。
咱蘇澳南方澳仔開始掠有飛刀、黑鯧、花煙，煙仔虎嘛仝款大出，咱宜蘭有一句俗語講：「三月初會寒死少年家」。意思是講三月時的天氣，雖然有當時仔會熱，毋過寒起來猶原像寒天遐寒。
冠軍老師這禮拜有炒米粉請阮食，伊講以早農村若有人客來，一定會先炒米粉請人客食。炒米粉的材料其實真簡單，嘛無貴，但是以早佇農村，一盤炒米粉就會當展現出-主人招待人客的彼款豐沛佮誠懇，炒米粉欲按怎炒才會芳，才會好食？冠軍老師講後禮拜伊欲介紹予咱聽。