竹安國小臺語每週一歌~~
學習目標 品德教育 中心德目 莊文龍
~~~~~~~~~~~~~~~~~~~~~~~~~~~~~~~~~~
第 一 週 笑微微
透早起來真歡喜，看著逐家笑微微，
逐工讀冊真趣味，予咱健康食百二。
第 二 週 樂學習
上愛日出天漸光，歡喜踏入學校門，
學著智識頭腦轉，快樂學習佇校園。
第 三 週 尊師道
老師緣投人緣好，教冊厲害人呵咾，
學校規矩教得好，學生健康閣活寶。
第 四 週 學透透
現代學生真正gau5，多元學習學透透，
人活到老學到老，毋通枉費少年頭。
第 五 週 來相褒
相褒歌曲臺灣寶，出喙成歌來相褒，
逐家來學真正好，欲揣這款世界無。
第 六 週 做好囝
現代褒歌真時行，唱出你我的心聲，
認真拍拚做好囝，疼惜臺灣同齊行。
第 七 週 美麗島
臺灣風景真正好，四界真媠好thit迌，
熱情通人攏呵咾，攏講臺灣美麗島。
第 八 週 愛臺灣
疼惜臺灣好所在，好山好水逐家愛，
徛踮世界的舞臺，展出你我好氣慨。
第 九 週 媠歌詩
臺語芬芳好氣味，轉化美麗媠歌詩，
巧妙運用激腦智，傳唱千年佮萬年。
第 十 週 著團結
你我有緣閣有心，互相學習感情深，
團結合作負責任，日後成功歌詩吟。
第 十一 週 惜時間
珍惜光陰愛惜時，時間親像若金錢，
小無注意飛過去，反悔袂當倒轉去。
第 十二 週 性命寶
咱的生命真寶貴，千萬毋通想袂開，
重新拍拚靠智慧，彩色人生有夠媠。
第 十三 週 人生路
人生的路真開闊，按怎來過較快活，
整好精神頭鬃捋，相準目標跤步伐。
第 十四 週 乖囡仔
宜蘭囡仔有夠巧，逐項代誌攏會曉，
拍球畫圖舞gau5跳，寫字真媠不得了。
第 十五 週 改過錯
看清家己的缺點，盡量改進愛顧謙，
誠心誠意來道歉，知錯能改人袂嫌。
第 十六 週 講好話
闔家平安真順序，健康快樂食百二，
學業進步笑微微，事業發展趁大錢。
第 十七 週 緊行動
跤踏實地緊行動，知影隨做才應當，
積沙成塔愛用功，樂觀奮鬥萬事通。
第 十八 週 顧社區
關心社區齊振動，服務他人毋輸人，
愛心付出鬥相共，出錢出力來幫忙。
第 十九 週 重創新
科技時代重創新，提昇能力上認真，
腦筋靈活行動緊，若欲成功著愛勤。
第 二十 週 鬥相報
欲予臺灣閣較好，請恁綴我按呢做，
好空逐家鬥相報，將咱的愛來傳播。
~~~~~~~~~~~~~~~~~~~~~~~~~~
竹安國小好名聲，校長主任真拍拚，
老師教册若拚命，家長呵咾佮感謝，
學生上課認真聽，考試一百第一名，
互相鼓勵鬥陣行，將來成功一定贏。
~~~~~~~~~~~~~~~~~~~~~~~~~~
