Ø 春
立春(新曆2月初4／初5)
簡介：立春神是新科狀元，代表新的開始，新的氣象。古早，皇帝會佇這工帶領官員祈求國泰民安，後來共這工定做「農民節」，表示對農民的感謝。
俗語：立春天氣晴，百物好收成。立春若好天，今年就會豐收。
立春落雨透清明。立春這工若落雨，清明進前就會厚雨。
人文活動：過年。舊曆正月初1，全家圍爐，鬧熱滾滾。
當令食材：
蔥仔。2月開始，宜蘭三星的蔥仔當著時。
薑。1月到2月，薑母大出，是食薑母鴨的好時機。
棗仔。高雄的蜜棗上出名，有人叫伊「臺灣蘋果」。
雨水（新曆2月19／20）
簡介：掌管這个節氣的神明是「海龍王」，所以佇「雨水」的前後定定會落雨，予稻仔食予飽水。
俗語：雨水，海水較冷鬼。天氣雖然已經入春，毋過海水的溫度猶閣真凍。
人文活動：元宵。正月15元宵節，臺灣有「北部天燈、南部蜂仔炮、東部寒單」的傳統民俗活動。
當令食材：青喙(吧咾魚(pa-láu-hî))(鯖魚)。臺灣東北角的南方澳量上濟。
驚蟄（新曆3月初5／初6）
簡介：掌管這个節氣的神是雷公，雷公會霆雷，共睏冬的蟲叫精神，所有佇寒人覕起來的蟲攏會出來活動。作穡人愛開始拍拚巡田水、掠害蟲。這陣嘛是杜鵑的花季。
俗語：驚蟄，鳥仔曝翼。寒人的時覕起來的鳥仔，佇這个時陣飛出來曝日。
人文活動：種樹節。3月，天氣開始燒烙，是種樹仔的好時陣。
當令食材：韭菜。桃園大溪的韭菜規年迵天攏有生產，毋過春天的韭菜上芳、上好食。
煙仔魚(鰹魚)。逐年3~6月，佇花蓮沿海會當掠著真濟煙仔魚。
春分（新曆3月20／21）
簡介：春分神是美麗的淑女，予大地的花開甲媠噹噹。「分」有時間分做兩半的意思，這工的日時佮暗暝的時間會平長。
俗語：春分落雨落到清明。春分到清明，定定會落雨。
人文活動：新曆3月29是青年節，雖然無放假，毋過這時嘛是蘭花開了當媠的時陣，會當利用這陣去賞花。
當令食材：柑仔蜜。12月到3月的柑仔蜜上好食。
鱸魚。3月底進入鱸魚的產季，用炊的、紅燒抑是煮湯攏真好食。
清明（新曆4月4／5日）
簡介：七爺是清明的神明，伊會共墓地的鬼怪趕走，予培墓的人安心。清明吹的是燒烙的東南風，會帶來真濟雨水，所以古早人才會講：「清明時節雨紛紛」。
俗語：雨淋墓頭紙，日曝穀雨田。清明若落雨，穀雨就會是好天。
人文活動：培墓。清明拜祖先，規家伙總出動。祭拜結束，會當佇郊外行行咧。
食潤餅。清明有食潤餅的風俗。
當令食材：芋仔。「清明芋，榖雨薑。」清明的芋仔鬆閣甜。
飛烏(飛魚)。蘭嶼對3月開始掠飛烏，天氣愈燒烙，飛烏的產量會愈來愈濟。
穀雨（新曆4月20／21）
簡介：春天上尾一个節氣。穀雨神手提缽，用缽內底的雨水來滋養萬物。穀雨的時定定會落雨，娘仔葉嘛發穎矣，飼娘仔的人愛開始無閒矣。油桐花這个時陣開了當媠。
俗語：穀雨，鳥隻做母。這時是鳥仔生湠的季節。
人文活動：三月痟媽祖。舊曆3月23是媽祖生，這个時陣臺灣各地有真濟相關的活動。
當令食材：梅仔。3月到5月，梅仔收成，以高雄桃源的產量上濟。
春茶。「穀雨前三日無茶挽，穀雨後三日挽袂赴。」穀雨前後是挽春茶的好時機。
Ø 夏
立夏（新曆5月初5／初6）
簡介：熱天的第一个節氣。立夏神一爿穿文官的衫，一爿穿武將的服裝，代表這馬是季節變化的時陣。臺灣進入黃酸仔雨的季節。山崙的相思仔開花，黃色的花蕊真古錐。
俗語：立夏，稻仔做老爸。立夏的時田裡的稻仔已經開始咧開花、吐穗。
人文活動：立夏，補老爸。立夏這工，南部有煮「匏仔麵」予老爸食補的風俗。
母親節。5月的第2个禮拜是母親節，會記得送剪絨仔花予阿母。
當令食材：
蕹菜(空心菜)。南投名間、宜蘭礁溪的蕹菜脆閣甜。
鹽酸仔(桑葚)。鹽酸仔會當做果汁，真好啉。
玉荷包荔枝。恆春的玉荷包上市。
小滿（新曆5月21／22）
簡介：小滿神穿的是滿人的服裝，是取其「滿」的意思；稻仔開始結穗，「滿」有豐收的意思。這个時陣是黃酸仔雨的季節，愛會記得清水溝仔，毋通予溝仔水滿出來。
俗語：小滿，雨水相趕。是咧講小滿的時，雨水真濟。
人文活動：舊曆4月26，「南鯤鯓代天府」服侍的李王爺佮范王爺的生辰。
嘛是藥王(神農大帝)的生辰。
當令食材：弓蕉。高雄旗山、美濃的弓蕉開始收成。
芒種（新曆6月初5／初6）
簡介：芒種神是提稻穗的看牛囡仔，代表豐收。南部準備欲割稻仔矣。黃酸仔雨接近尾聲，換做西北雨。荷花現此時開了當媠。
俗語：芒種蝶仔討無食。芒種的時，真濟植物已經結子，蝶仔無花通採蜜，所以「討無食」。
人文活動：五月節。舊曆5月初5「五月龍船北。」「未食五月節粽，破裘毋甘放。」佇五月節進前，天氣猶無穩定，這工過了，正式進入熱天矣。
當令食材：櫻桃。臺灣的櫻桃以進口為主，北半球大出的時間是佇5月到8月。
夏至（新曆6月21／22）
簡介：夏至神手提火把佮葵扇，表示天氣真熱。這工是日時上長的一工。
俗語：夏至，風颱就出世。夏至開始，風颱會開始威脅臺灣。
人文活動：畢業。鳳凰花開的季節，學生欲畢業矣。
當令食材：檨仔。臺南是檨仔上大的產地，這陣的檨仔甜閣芳。
小暑（新曆7月初7／初8）
簡介：提火盤的小鬼是這个時陣的節氣神，表示天氣非常熱。下晡雄雄一陣西北雨，共燒氣小可仔降落來。
俗語：小暑過，一日熱三分。意思是小暑這工過去了後，天氣一工比一工較熱。
人文活動：「六月六，仙草水米篩目。」天氣真熱，清涼的仙草水佮米篩目是這陣上好的食品。
當令食材：
菜瓜。5月到9月，雲林、嘉義、臺南是主要的產地。
瓜仔哖(小黃瓜)。熱天瓜仔哖當著時。
蓮子。5月到8月，臺南白河的產量上濟，桃園佮嘉義嘛有出產。
大暑（新曆7月23／24）
簡介：提大火盤的小鬼是這个時陣的節氣神，表示天氣大熱。第二期的田已經佈好。現此時風颱真濟，愛注意氣象報告。
俗語：大暑熱袂透，大水風颱到。大暑是一年上熱的時陣，若是這時無夠熱，就代表天氣袂順，紲落來的日子，天災可能會真濟。
人文活動：半年節。舊曆6月15，是全年的一半，這工拜拜了後會食「半年圓」，代表甜蜜佮團圓。
當令食材：王梨。「大暑食王梨。」臺南關廟、屏東、高雄、嘉義、南投的王梨攏真有名。王梨酥是臺灣上出名的伴手。
Ø 秋
立秋（新曆8月初7／初8）
簡介：秋天開始。佇古早，立秋這工皇帝會
官員鬥陣「迎秋」。臺灣的地理較南爿，這陣的日時猶閣真熱，毋過早暗會較涼。東部的金針花開矣。
俗語：立秋無雨上堪憂。立秋無落雨，規年的雨水會較少。
雷拍秋，冬半收。立秋霆雷公是歹吉兆，代表紲落來農作物的收成會真䆀。
人文活動：父親節。新曆8月初8是父親節，愛會記得感謝阿爸的辛苦。
當令食材：
筍。「七月筍」麻竹筍、青竹筍、茭白筍當著時，鮮閣清甜。
龍眼。龍眼又閣叫做「福圓」，古早人講：「食福圓，生囝生孫中狀元。」
處暑（新曆8月23／24）
簡介：處暑神是一个滿面鬍鬚，生做真歹面腔的武將，代表這時雖然是秋天，毋過天氣猶是真熱，一點仔嘛無成秋天，這陣的風颱嘛真濟，天氣真無穩定。
俗語：處暑，會曝死鳥鼠。是咧講處暑的時，天氣猶閣真熱。
人文活動：七月普渡。俗語講：「毋驚七月半鬼，只驚七月半水。」七月半鬼門開，臺灣各地攏有普渡的活動。毋過風颱比鬼閣較恐怖，會帶來大水。
當令食材：梨仔 (高接梨) 。「百果之宗」梨仔，甜閣厚汁。
金針。8月，臺東佮花蓮的金針當著時。
白露（新曆9月初7／初8）
簡介：白露神手提葫蘆，內底貯清涼的露水，表示天氣變涼矣，早暗的水氣會結做露水。所以下早仔出門的時就愛加穿寡衫喔。
俗語：白露大落大白。白露的時若落大雨，稻仔的生長會受著破壞，影響收成。
人文活動：中秋。舊曆9月15的中秋節是這陣重要的節日，家家戶戶團圓，食柚仔，切月餅，佇臺灣閣發展出烘肉的活動。
當令食材：
文旦。臺南麻豆、雲林斗六、花蓮鶴岡是主要的產地。
桂花。桂花清芳，會當做桂花蜜。
虱目魚。秋天的虱目魚品質上好。臺灣南部沿海攏有飼。
秋分（新曆9月23／24）
簡介：秋分的特色是：熱天的霆雷聲收起來矣；四界颺颺飛、蟯蟯趖的蟲攏覕起來準備過冬；秋冬的水氣少，空氣予人感覺焦燥；田裡的稻仔攏成做金黃色的稻穗。
俗語：秋分，暝日對分。秋分這工日時佮暗時平長，這工若過，暝時會愈來愈長。
人文活動：教師節。新曆9月28教師節，愛感謝老師的指導喔。
當令食材：菱角。品種「兩角仔」的菱角佇秋天收成，炊炊咧就真好食。
寒露（新曆10月初8／初9）
簡介：寒露神是手提大刀的俠士，予人清冷的感覺。東北風開始吹來，毋過天氣猶袂真寒，這个時陣是一年當中氣候予人感覺上爽快的時陣。
俗語：寒露，百草枯。天氣開始變寒，大部分的花草開始蔫去。
人文活動：重陽節。舊曆9月初9重陽節，嘛是敬老節，這个時陣天氣好，會當
阿公、阿媽出去行行咧。
當令食材：蟳仔。秋天的蟳仔產量濟，當著時。
栗子。10月嘉義中埔栗子當著時。
霜降（新曆10月23／24）
簡介：秋天上尾一个節氣，手提雙刀的霜降神，表示天氣愈來愈寒，臺灣的懸山佇透早的時，塗跤會結霜。這陣有白茫茫的菅芒佮紅絳絳的楓仔。
俗語：霜降，風颱走去藏。霜降了後，就袂有風颱矣，毋過現此時氣候變遷，嘛是有11月風颱的紀錄。
人文活動：臺灣光復節。新曆10月25是臺灣光復節，這工雖然無放假，毋過嘛是愛了解歷史的典故喔。
當令食材：白柚。臺南麻豆的白柚上好食。
柿仔。9月到11月，以苗栗、新竹、臺中的產量上濟。
龍蝦。臺北淡水的出海口有機會會當掠著龍蝦。
Ø 冬
立冬（新曆11月初7／初8）
簡介：寒人的第一个節氣，立冬神穿裘仔、戴帽仔，代表天氣寒冷。過冬鳥嘛對北方的國家飛來矣。
俗語：立冬收成期，雞鳥較會啼。田裡無閒收成，落落來的米粟予野鳥、土雞仔抾去食，
食了歡喜，自然會開喙啼叫。
人文活動：補冬。「立冬補冬，補喙空。」臺灣人寒人愛食補，薑母鴨、羊肉爐的餐廳，定定看著人客坐甲滿滿。
當令食材：
柑仔。寒天柑仔大出，品質上好。
番麥。11月到4月，臺灣的嘉義、雲林是主要的產地。
小雪（新曆11月22／23）
簡介：小雪神提旗仔共寒冷的霜雪擛來，有的國家會開始落雪，臺灣的天氣嘛真寒，毋過猶袂落雪，恆春會出現落山風。
<p class="MsoNormal" style="margin-left: 36.0pt; text-indent: -36.0pt; mso