~~阿爸的話~~
保重身體愛勇健，早睏早起第一名，時間規畫行程訂，阿爸的話著愛聽。
循序漸進頭一件，三思而行好名聲，認真骨力足拍拚，萬事順利一定贏。
出外頭路予人倩，敬業精神算上精，毋管將來欲做啥，頂真做事規山坪。
行善做好心就正，意外驚喜著生驚，生財有道誠意請，滿面春風少年兄。
厝內清氣較捷摒，物件毋好四界抨，乖巧有孝得人疼，家教禮節會共人唌。
反省檢討加照鏡，讀冊讀佇尻脊骿，千萬毋通毋信聖，修身養性大本營。
開源節流主心定，鼓勵囡仔做好囝，改過自新知足疼，前途快樂光明埕。
樂觀知命真奢颺，好空相伨鬥陣行，好心好報定有影，財利通敨滇門庭。
行船走馬三分命，爸母用心共咱晟，誠心誠意會感謝，平安幸福滿大廳。
。
~會小心~捷注意~愛細膩~小張持~
~用慎重~較謹慎~定斟酌~免生狂~
~老根節~誠點陳~有站節~知撙節~
~加節制~冗分寸