情網
《情網》Tsîng-bāng
羅一良Lô It-liông
——————————————
今夜又獻出笑容
kim-iā iū hiàn-tshut tshiò-iông
歡迎阮入酒場內
huan-gîng gún ji̍p tsiú-tiûnn lāi
並倚來阮身邊
phīng uá-lâi gún sin-pinn
滿口假情愛
muá-kháu ké tsîng-ài
伊當做阮全毋知
i tòng-tsuè gún tsuân m̄-tsai
啊~阮全毋知
ah~ gún tsuân m̄-tsai
毋是為著解心悶
m̄-sī uī-tio̍h kái-sim-būn
啥人想欲來
siánn-lâng siūnn-beh lâi
↓↓(口白)—(口白)↓↓
親像你這款
tshin-tshiūnn lí tsit khuán
踮酒場的女性
tiàm tsiú-tiûnn ê lú-sìng
我怎毋知影
guá tsuánn m̄ tsai-iánn
你心內是咧想啥物貨
lí sim-lāi sī teh siūnn siánn-mih-huè
對我痴痴迷迷獻妖嬌
tuì guá tshi-tshi-bê-bê hiàn iau-kiau
哪有啥路用咧
ná-ū siánn lōo-īng–leh
我是一个內行的人
guá sī tsi̍t-ê lāi-hâng ê lâng
經過的苦湯
king-kè ê khóo-thng
我也啉真濟矣
guá iā lim tsin tsuē–ah
無論你用啥物步數
bô-lūn lí iōng sánn-mih pōo-sòo
也是攻我袂倒咧
iā-sī kong guá buē-tó–leh
哈哈哈~
ha ha ha~
↑↑(口白)—(口白)↑↑
昔日的彼擺經驗
sik-ji̍t ê hit pái king-giām
已經阮也試苦味
í-king gún iā tshì khóo-bī
看透伊心肝內
khuànn-thàu i sim-kuann-lāi
何必獻嬌媚
hô-pit hiàn kiau-bī
無疑伊對阮表示
bô-gî i tuì gún piáu-sī
啊~對阮表示
ah~ tuì gún piáu-sī
為著失戀來墜落
uī-tio̍h sit-luân lâi tuī-lo̍h
目屎澹目墘
ba̍k-sái tâm ba̍k kînn
↓↓(口白)—(口白)↓↓
欸!你閣講甲
eh! lí koh kóng kah
目屎流目屎滴
ba̍k-sái lâu ba̍k-sái tih
敢若實在的咧
kánn-ná si̍t-tsāi–ê leh
哼哼!著啦著啦
hngh hngh! tio̍h–lah tio̍h–lah
世間當然有
sè-kan tong-jiân ū
幾个仔不肖的男子
kuí-ê-á put-siàu ê lâm-tsú
害著恁女性墜落火坑
hāi-tio̍h lín lú-sìng tuī-lo̍h hé-khinn
看起來你的做人
khuànn–khí-lâi lí ê tsuè-lâng
閣佮以前的
koh kah í-tsîng–ê
大不相同
tāi put siong-tông
閣有淡薄仔純情的款怎樣
koh ū tām-po̍h-á sûn-tsîng ê khuán tsánn-iūnn
↑↑(口白)—(口白)↑↑
今夜來靠著酒味
kim-iā lâi khò-tio̍h tsiú-bī
麻痺阮的心苦痛
bâ-pì gún ê sim khóo-thàng
想袂到伊運命
siūnn buē-kàu i ūn-miā
佮阮真相仝
kah gún tsin sio-kāng
若真是可憐花欉
nā tsin sī khó-liân hue-tsâng
啊~可憐花欉
ah~ khó-liân hue-tsâng
甘願娶伊做妻兒
kam-guān tshuā i tsuè tshe-jî
過著一世人
kè tio̍h tsi̍t-sì-lâng
