離別的港口
《離別的港口》Lî-pia̍t ê Káng-kháu
羅一良Lô It-liông
——————————————
火船螺聲哀悲
hé-tsûn-lê siann ai-pi
催阮佮伊來分離
tshui gún kah i lâi hun-lî
雖然我來離開去
sui-jiân guá lâi lī-khui–khì
心卻在你的身邊
sim khiok tsāi lí ê sin-pinn
請保重身體唷
tshiánn pó-tiōng sin-thé–iooh
你我分離不得已
lí guá hun-lî put-tik-í
再會啦
tsài-huē–lah
期待著
kî-thāi tio̍h
期待著再相見
kî-thāi tio̍h tsài sann-kìnn
海鳥也在港邊
hái-tsiáu iā tsāi káng-pinn
飛來飛去飛做堆
pe-lâi-pe-khì pe tsuè-tui
怎樣咱著來分開
tsánn-iūnn lán tio̍h lâi hun-khui
袂得來成雙成對
bē-tit lâi sîng-siang sîng-tuì
心愛的再會啦
sim-ài–ê tsài-huē–lah
請你毋通流珠淚
tshiánn lí m̄-thang lâu tsu-luī
再會啦
tsài-huē–lah
期待著
kî-thāi tio̍h
期待著再做堆
kî-thāi tio̍h tsài tsuè-tui
船已經開出去
tsûn í-king khui–tshut-khì
載阮遠遠一直去
tsài gún hn̄g-hn̄g it-ti̍t khì
想起著甜蜜情義
siūnn-khí tio̍h tinn-bi̍t tsîng-gī
加添阮心內傷悲
ka-thiam gún sim-lāi siong-pi
滿腹的熱情唷
muá-pak ê jia̍t-tsîng–iooh
只有寄著海水去
tsí-ū kià tio̍h hái-tsuí khì
再會啦
tsài-huē–lah
期待著
kî-thāi tio̍h
期待著再相見
kî-thāi tio̍h tsài sann-kìnn
