秋菊花開時
《秋菊花開時》Tshiu-kiok-hue Khui Sî
顏華Gân Huâ
——————————————
黃昏時在山崙
hông-hun sî tsāi suann-lūn
秋風搖樹枝
tshiu-hong iô tshiū-ki
無聊的情景味
bô-liâu ê tsîng-kíng bī
伴阮想彼時
phuānn gún siūnn hit-sî
啊~彼爿山跤小路邊
ah~ hit-pîng suann-kha sió-lōo pinn
秋菊獻嬌媚
tshiu-kiok hiàn kiau-bī
雖然花蕊笑微微
sui-jiân hue-luí tshiò bî-bî
歡喜開花期
huann-hí khui-hue kî
阮的青春
gún ê tshing-tshun
已經過時
í-king kè-sî
暝日心酸悲
mî-ji̍t sim sng-pi
看天邊鳥隻飛
khuànn thinn-pinn tsiáu-tsiah pue
雙雙回岫去
siang-siang huê-siū khì
心愛的流浪兒
sim-ài ê liû-lōng-jî
現時在哪裡
hiān-sî tsāi ná-lí
啊~彼爿山跤小路邊
ah~ hit-pîng suann-kha sió-lōo pinn
秋菊獻嬌媚
tshiu-kiok hiàn kiau-bī
枉費阮來心綿綿
óng-huì gún lâi sim mî-mî
暝日思念伊
mî-ji̍t su-liām i
郎君猶原踮在他鄉
lông-kun iu-guân tiàm-tsāi thann-hiong
音訊斷半絲
im-sìn tn̄g puànn-si
稀微的小山崙
hi-bî ê sió suann-lūn
月娘出山邊
ge̍h-niû tshut suann-pinn
淒冷的露水滴
tshe-líng ê lōo-tsuí tih
親像阮珠淚
tshin-tshiūnn gún tsu-luī
啊~彼爿山跤小路邊
ah~ hit-pîng suann-kha sió-lōo pinn
秋菊獻嬌媚
tshiu-kiok hiàn kiau-bī
秋風因何吹不離
tshiu-hong in-hô tshue put-lī
對阮薄情義
tuì gún po̍k tsîng-gī
無惜阮是
bô-sioh gún sī
無人看顧
bô-lâng khuànn-kòo
可憐的花蕊
khó-liân ê hue-luí
