生活影印機
《生活影印機》Sing-ua̍h Iánn-ìn-ki
蔡秋鳳 Tshuà Tshiu-hōng
——————————————
醒來身邊已經是無人
tshínn lâi sin-pinn í-king sī bô-lâng
日頭照入鋁門窗
ji̍t-thâu tsiò ji̍p lū-mn̂g-thang
昨暝浸著燒酒的頭鬃
tsa-mî tsìm tio̍h sio-tsiú ê thâu-tsang
猶原鼻著陣陣的酒芳
iu-guân phīnn tio̍h tsūn-tsūn ê tsiú-phang
身軀佮一領退色的夢
sin-khu kah tsi̍t-niá thuè-sik ê bāng
雙手搝牢毋願放
siang-tshiú khiú tiâu m̄-guān pàng
啊~又閣是
ah~ iū-koh sī
又閣是仝款的一工
iū-koh sī kāng-khuán ê tsi̍t-kang
生活親像影印機
sing-ua̍h tshin-tshiūnn iánn-ìn-ki
昨昏印的是記持
tsa-hng ìn–ê sī kì-tî
今仔日印的是昨暝
kin-á-ji̍t ìn–ê sī tsa-mî
有時烏甲心稀微
ū-sî oo kah sim hi-bî
有時淺甲毋知啥物是日子
ū-sî tshián kah m̄-tsai siánn-mih sī ji̍t-tsí
逐工猶是揣無你
ta̍k-kang iáu-sī tshuē-bô lí
烏白的未來
oo-pe̍h ê bī-lâi
烏白的過去
oo-pe̍h ê kuè-khì
生活親像一台影印機
sing-ua̍h tshin-tshiūnn tsi̍t-tâi iánn-ìn-ki
揣無你
tshuē-bô lí
借伊來COPY
tsioh i lâi khóo-pih
印出千千萬萬的你
ìn-tshut tshian-tshian-bān-bān ê lí
