高原列車

《高原列車》Ko-guân Lia̍t-tshia
林英美Lîm Ing-bí
——————————————
火車走過深山
hé-tshia tsáu kè tshim-suann
看見清幽牧場邊
khuànn-kìnn tshing-iu bo̍k-tiûnn pinn
一位鄉村姑娘
tsi̍t-uī hiong-tshuan koo-niû
對咱獻花表情意
tuì lán hiàn-hue piáu tsîng-ì
明朗的天色
bîng-lóng ê thinn-sik
風光明媚好景緻
hong-kong bîng-bī hó kíng-tì
盤過山嶺
puânn kè suann-niá
走過山墘
tsáu kè suann-kînn
向前一直去
hiòng-tsîng it-ti̍t khì
啦~高原列車
lah~ ko-guân lia̍t-tshia
伴咱自由
phuānn lán tsū-iû
啦~一直去
lah~ it-ti̍t khì

綠色深坑風吹
li̍k-sik tshim-khinn hong tshue
一蕊百合白如綿
tsi̍t-luí pik-ha̍p pe̍h jû mî
一台遊覽客車
tsi̍t-tâi iû-lám-kheh-tshia
送來歌聲動人耳
sàng lâi kua-siann tōng lâng hī
車內的男女
tshia-lāi ê lâm-lú
滿面春風笑嘻嘻
muá-bīn tshun-hong tshiò hi-hi
盤過山嶺
puânn kè suann-niá
走過山墘
tsáu kè suann-kînn
向前一直去
hiòng-tsîng it-ti̍t khì
啦~高原列車
lah~ ko-guân lia̍t-tshia
伴咱青春
phuānn lán tshing-tshun
啦~一直去
lah~ it-ti̍t khì

火車鑽出山洞
hé-tshia tsǹg tshut suann-tōng
看見湖面水青青
khuànn-kìnn ôo-bīn tsuí tshinn-tshinn
一對小鳥叫啼
tsi̍t-tuì sió-niáu kiò-thî
飛來飛去在湖邊
pe-lâi-pe-khì tsāi ôo-pinn
火車的水螺
hé-tshia ê tsuí-lê
甘蜜聲欲牽長詩
kam-bi̍t siann beh khan tn̂g-si
盤過山嶺
puânn kè suann-niá
走過山墘
tsáu kè suann kînn
向前一直去
hiòng-tsîng it-ti̍t khì
啦~高原列車
ko-guân lia̍t-tshia
伴咱希望
phuānn lán hi-bāng
啦~一直去
lah~ it-ti̍t khì