青梅竹馬
《青梅竹馬》Tshing-muê Tik-má
邱淑君Khu Siok-kun
——————————————
細漢的時陣
suè-hàn ê sî-tsūn
你蹛阮厝隔壁
lí tuà gún tshù keh-piah
雙人嘛不時結做伴
siang-lâng mā put-sî kiat tsuè-phuānn
哥哥爸爸唱袂煞
kó-koh pá-pah tshiùnn buē-suah
手牽手
tshiú khan-tshiú
踮溪邊褪赤跤
tiàm khe-pinn thǹg-tsiah-kha
如今你
jû-kim lí
為著前途來出外
uī-tio̍h tsiân-tôo lâi tshut-guā
故鄉的我
kòo-hiong ê guá
真正孤單
tsin-tsiànn koo-tuann
每日思念你
muí-ji̍t su-liām lí
相片金金看
siòng-phìnn kim-kim khuànn
你捌講過
lí bat kóng–kuè
永遠會想起我
íng-uán ē siūnn-khí guá
他鄉雨落甲遮爾大
thann-hiong hōo lo̍h kah tsiah-nī tuā
陣陣風是遮爾寒
tsūn-tsūn hong sī tsiah-nī kuânn
希望你衫著加添寡
hi-bāng lí sann tio̍h ka-thiam–kuá
