袂生牽拖厝邊
《袂生牽拖厝邊》Buē Sinn Khan-thua Tshù-pinn
邱淑君Khu Siok-kun
——————————————
毋通相信算命喙唷
m̄-thang siong-sìn sǹg-miā-tshuì–iooh
七早八早面仔青青
tshit-tsá-pueh-tsá bīn-á tshinn-tshinn
我無趁你媒人錢
guá bô thàn lí muî-lâng tsînn
囉哩囉嗦亂規暝
lō-lih-lo-so luān kui-mî
對阮膏膏纏
tuì gún ko-ko-tînn
見笑的代誌
kiàn-siàu ê tāi-tsì
莫創治唷
mài tshòng-tī–iooh
無理無由
bô-lí-bô-iû
無趣無味
bô-tshù-bô-bī
一欉桃花袂結子
tsi̍t-tsâng thô-hue buē kiat-tsí
著愛怪你怪家己
tio̍h-ài kuài lí kuài ka-kī
哪通怨兄弟
ná thang uàn hiann-tī
袂生牽拖厝邊
buē sinn khan-thua tshù-pinn
袂生牽拖厝邊
buē sinn khan-thua tshù-pinn
人講出門看天氣唷
lâng kóng tshut-mn̂g khuànn thinn-khì–iooh
甘蔗並無雙頭甜
kam-tsià pīng bô siang-thâu tinn
有錢無錢免掛意
ū-tsînn bô-tsînn bián kuà-ì
講話毋通糊瘰瘰
kóng-uē m̄-thang hôo-luì-luì
攑頭有看天
gia̍h-thâu ū khuànn thinn
花開有時
hue khui ū sî
莫臭屁唷
mài tshàu-phuì–iooh
凡事毋通空費心機
huân-sū m̄-thang khang-huì sim-ki
拍火掠賊親兄弟
phah-hué lia̍h-tsha̍t tshin hiann-tī
哪通一隻好好鱉
ná thang tsi̍t-tsiah hó-hó pih
刣甲流血流滴
thâi kah lâu-hueh-lâu-tih
袂生牽拖厝邊
buē sinn khan-thua tshù-pinn
袂生牽拖厝邊
buē sinn khan-thua tshù-pinn
