予阮靜靜想看覓
《予阮靜靜想看覓》Hōo Gún Tsīng-tsīng Siūnn Khuànn-māi
文鶯Bûn-ing
——————————————
彼一日佮你見面
hit-tsi̍t-ji̍t kah lí kìnn-bīn
初次的見面
tshoo-tshù ê kìnn-bīn
雖然你表示
sui-jiân lí piáu-sī
希望佮阮做朋友
hi-bāng kah gún tsuè pîng-iú
毋過阮毋知
m̄-koh gún m̄-tsai
你是啥款的男兒
lí sī siánn-khuán ê lâm-jî
你予阮靜靜想看覓
lí hōo gún tsīng-tsīng siūnn khuànn-māi
↓↓(口白)—(口白)↓↓
你寄來的一張批信
lí kià–lâi ê tsi̍t-tiunn phe-sìn
約阮欲相會
iok gún beh siong-huē
毋過阮佮你熟似
m̄-koh gún kah lí si̍k-sāi
只有兩三日爾爾
tsí-ū nn̄g-sann-ji̍t niā-niā
阮毋敢隨便答應
gún m̄-kánn suî-piān tah-ìng
你嘛會分明
lí mā ē hun-bîng
你予阮靜靜想看覓咧
lí hōo gún tsīng-tsīng siūnn khuànn-māi–leh
好毋
hó–m̄?
↑↑(口白)—(口白)↑↑
有一日踮在街頭
ū-tsi̍t-ji̍t tiàm-tsāi ke-thâu
又閣拄著你
iū-koh tú-tio̍h lí
你態度溫柔可愛
lí thāi-tōo un-jiû khó-ài
予阮心花開
hōo gún sim-hue khui
阮雖然感覺
gún sui-jiân kám-kak
你是正經的男兒
lí sī tsìng-king ê lâm-jî
你予阮靜靜想看覓
lí hōo gún tsīng-tsīng siūnn khuànn-māi
↓↓(口白)—(口白)↓↓
今夜阮答應佮你
kim-iā gún tah-ìng kah lí
初次的約會
tshoo-tshù ê iok-huē
阮感覺一心歡喜
gún kám-kak tsi̍t-sim huann-hí
一心又閣驚疑
tsi̍t-sim iū-koh kiann-gî
少女的這款心情
siàu-lú ê tsit khuán sim-tsîng
你敢會分明
lí kám ē hun-bîng
你予阮靜靜想看覓咧
lí hōo gún tsīng-tsīng siūnn khuànn-māi–leh
好毋
hó–m̄?
↑↑(口白)—(口白)↑↑
你送阮一蕊玫瑰
lí sàng gún tsi̍t-luí muî-kuì
紅色的玫瑰
âng-sik ê muî-kuì
這敢是表示
tse kám-sī piáu-sī
你的愛阮的心意
lí ê ài gún ê sim-ì
阮毋敢隨便接受
gún m̄-kánn suî-piān tsiap-siū
你的好情意
lí ê hó tsîng-ì
你予阮靜靜想看覓
lí hōo gún tsīng-tsīng siūnn khuànn-māi
阮相信
gún siong-sìn
你是一个純情的男兒
lí sī tsi̍t-ê sûn-tsîng ê lâm-jî
阮心內已經
gún sim-lāi í-king
每日暗暗思戀你
muí-ji̍t àm-àm su-luân lí
毋過又驚你變心
m̄-koh iū kiann lí piàn-sim
害阮心傷悲
hāi gún sim siong-pi
你予阮我靜靜想看覓
lí hōo gún tsīng-tsīng siūnn khuànn-māi
你予阮我靜靜想看覓
lí hōo gún tsīng-tsīng siūnn khuànn-māi
