思想起再見
《思想起再見》Su-sióng-khí Tsài-kiàn
鱸鰻阿德Lôo-muâ A-tik(黃永德 N̂g Íng-tik)
——————————————
思啊雙啊枝
su–ah siang–ah khí
細漢時上愛食彼个
sè-hàn sî siōng ài tsia̍h hit ê
芋仔配番薯
ōo-á phuè han-tsî
山珍佮海味咿嘟
san-tin kah hái-bī–ih-toh
無地比啊咿嘟哎喲喂
bô-tèr pí–ah ih-toh ai-iō-uê
艱苦的日子
kan-khóo ê ji̍t-tsí
散赤甲
sàn-tshiah kah
無法度活落去
bô-huat-tōo ua̍h–lo̍h-khì
哎喲喂
ai-iō-uê
散赤甲強欲死
sàn-tshiah kah kiōng-beh sí
攏無法度通活落去
lóng bô-huat-tōo thang ua̍h–lo̍h-khì
思啊雙啊枝
su–ah siang–ah khí
大漢時離開了故鄉
tuā-hàn sî lī-khui liáu kòo-hiong
來到大都市
lâi-kàu tuā too-tshī
無暝閣無日啊
bô-mî koh bô-ji̍t–ah
只為著趁錢啊咿嘟哎喲喂
tsí uī tio̍h thàn-tsînn–ah ih-toh ai-iō-uê
細漢的滋味
sè-hàn ê tsu-bī
一世人無法度放袂記
tsi̍t-sì-lâng bô-huat-tōo pàng-buē-kì
哎喲喂
ai-iō-uê
無法度放袂記
bô-huat-tōo pàng-buē-kì
囥踮心肝內幾若年
khǹg tiàm sim-kuann-lāi kuí-lō nî
思啊雙啊枝
su–ah siang–ah khí
現此時做兵啊退伍
hiān-tsú-sî tsò-ping–ah thuè-ngóo
換來做歌星
uānn lâi tsò kua-tshinn
拚死閣拚活只為著
piànn sí koh piànn ua̍h tsí uī-tio̍h
出頭天咿嘟哎喲喂
tshut-thâu-thinn–ih-toh ai-iō-uê
怨嘆阮自己
uàn-thàn gún tsū-kí
為啥物無姓李名登輝
uī-siánn-mih bô sènn Lí miâ Ting-hui
哎喲喂
ai-iō-uê
為啥物無姓李
uī-siánn-mih bô sènn Lí
也無將名字叫登輝
iā bô tsiong miâ-jī kiò Ting-hui
