爸爸媽媽
《爸爸媽媽》Pá-pah Má-mah
許懷造Khóo Huâi-tsō(阿寶,泉州晉安)
——————————————
秋風吹起
tshiu-hong tshue khí
夜雨落袂離
iā-ú lo̍h buē-lī
天色未光小菜市
thinn-sik bē kng sió-tshài-tshī
路燈也稀微
lōo-ting iā hi-bî
酸酸的露水
sng-sng ê lōo-tsuí
雺霧罩滿天
bông-bū tà buán-thinn
六月炎熱夏日時
la̍k-ge̍h iām-jua̍h hā-ji̍t sî
只有草笠仔遮目墘
tsí-ū tsháu-lue̍h-á tsia ba̍k-kînn
為了囝兒出頭天
uī-liáu kiánn-jî tshut-thâu-thinn
毋捌好好睏入暝
m̄-bat hó-hó khùn ji̍p-mî
世事變化無定時
sè-sū piàn-huà bô-tīng-sî
閣較艱苦也願意
koh-khah kan-khóo iā guān-ì
毋管是地動
m̄-kuán sī tē tāng
抑是風颱天
ia̍h-sī hong-thai-thinn
囝兒的代誌
kiânn-jî ê tāi-tsì
攏是囥在第一位
lóng-sī khǹg tsāi tē-it uī
爸爸的教示
pá-pah ê kà-sī
我會永遠記在心
guá ē íng-uán kì tsāi-sim
為了理想來堅持
uī-liáu lí-sióng lâi kian-tshî
爭取早日的勝利
tsing-tshú tsá-ji̍t ê sìng-lī
媽媽的疼痛
má-mah ê thiànn-thàng
鼓勵佮支持
kóo-lē kah tsi-tshî
恁的恩情親像天
lín ê un-tsîng tshin-tshiūnn thinn
永遠袂來放袂記
íng-uán buē lâi pàng-buē-kì
