看破的戀夢
《看破的戀夢》Khuànn-phuà ê Luân-bāng
周蓬霖Tsiu Hông-lîm
——————————————
我心愛彼个人
guá sim-ài hit ê lâng
是無緣的人
sī bô-iân ê lâng
伊是楊花水性的女性
i sī iông-hua tsuí-sìng ê lú-sìng
做男兒予伊
tsuè lâm-jî hōo i
騙去寶貴的青春
phiàn khì pó-kuì ê tshing-tshun
我的金錢我的地位
guá ê kim-tsînn guá ê tē-uī
我的所有已經破碎
guá ê sóo-ū í-king phuà-tshuì
我總是看破一切
guá tsóng–sī khuànn-phuà it-tshè
毋願閣想你
m̄-guān koh siūnn lí
抱著美麗春夢
phō tio̍h bí-lē tshun-bāng
來過著日子
lâi kuè tio̍h ji̍t-tsí
誰知為伊
siáng tsai uī i
全部來拍碎
tsuân-pōo lâi phah-tshuì
做男兒來目屎滴
tsuè lâm-jî lâi ba̍k-sái tih
也是枉費啦
iā-sī óng-huì–lah
世間女性毋是每个
sè-kan lú-sìng m̄-sī muí-ê
攏親像你遮爾薄情
lóng tshin-tshiūnn lí tsiah-nī po̍k-tsîng
我總是毋願為著你
guá tsóng–sī m̄-guān uī-tio̍h lí
繼續來痴迷
kè-sio̍k lâi tshi-bê
放捒了痴戀夢
pàng-sak liáu tshi-luân bāng
來離開故鄉
lâi lī-khui kòo-hiong
毋願為女性
m̄-guān uī lú-sìng
來誤前途
lâi gōo tsiân-tôo
做男兒需要志氣
tsuè lâm-jî su-iàu tsì-khì
悲傷無路用
pi-siong bô-lōo-iōng
你的假情你的假愛
lí ê ké-tsîng lí ê ké-ài
你的虛榮你的薄命
lí ê hi-îng lí ê po̍k-bīng
我總是當做
guá tsóng–sī tòng-tsuè
一場悲哀的戀夢
tsi̍t-tiûnn pi-ai ê luân-bāng
