已經慣勢
《已經慣勢》Í-king Kuàn-sì
王茉聿Ông Bua̍t-u̍t
——————————————
也無天星會當看見
iā bô thinn-tshinn ē-tàng khuànn–kìnn
也無月娘通來聽見
iā bô gue̍h-niû thang lâi thiann–kìnn
寂寞的暝
tsi̍k-bo̍k ê mî
寂寞的心
tsi̍k-bo̍k ê sim
路燈照著
lōo-ting tsiò–tio̍h
只有空虛
tsí-ū khang-hi
也捌行過幾段旅程
iā bat kiânn kuè kuí tuānn lú-tîng
也捌經過美麗風景
iā bat king-kuè bí-lē hong-kíng
過路的人
kuè-lōo ê lâng
過路的你
kuè-lōo ê lí
留著記持
lâu tio̍h kì-tî
無留真心
bô lâu tsin-sim
其實已經過去
kî-si̍t í-king kuè–khì
過去毋知敢過去
kuè-khì m̄-tsai kám kuè–khì
其實已經袂記
kî-si̍t í-king buē-kì
袂記敢欲記袂記
buē-kì kám beh kì buē-kì
其實已經慣勢
kî-si̍t í-king kuàn-sì
一个人學著慣勢
tsi̍t-ê-lâng o̍h tio̍h kuàn-sì
只是有時
tsí-sī ū-sî
天暗抑是天光
thinn àm ia̍h-sī thinn kng
分袂清
hun buē-tshing
只是想著你
tsí-sī siūnn-tio̍h lí
目睭的雨
ba̍k-tsiu ê hōo
就毋知停
tiō m̄-tsai thîng
只是毋願清醒
tsí-sī m̄-guān tshing-tshínn
只是夢中
tsí-sī bāng-tiong
你猶佇我身邊
lí iáu tī guá sin-pinn
