四季歌詩
《四季歌詩》Sù-kuì Kua-si
余國光Î Kok-kong
——————————————
春天已經漸漸醒
tshun-thinn í-king tsiām-tsiām tshínn
滿山野花芳透天
muá-suann iá-hue phang thàu-thinn
蝴蝶規大陣
ôo-tia̍p kui-tuā-tīn
飛向四爿邊
hui hiòng sì-pîng pinn
賞花欉
siúnn hue-tsâng
試花甜
tshì hue-tinn
一生青春趁這時
it-sing tshing-tshun thàn tsit-sî
夏天日頭拍拚催
hā-thinn ji̍t-thâu phah-piànn tshui
南風雄雄趕到位
lâm-hong hiông-hiông kuánn kàu-uī
蓮花放心開
liân-hue hòng-sim khui
一開百外蕊
tsi̍t khui pah-guā luí
白蓮嬌
pe̍h-lián kiau
紅蓮媠
âng-lián suí
親像彩霞跋落水
tshin-tshiūnn tshái-hâ pua̍h lo̍h-tsuí
秋天月娘上蓋光
tshiu-thinn ge̍h-niû siōng-kài kng
月光一步千里遠
ge̍h-kng tsi̍t-pōo tshian-lí hn̄g
何時通倒轉
hô-sî thang tò-tńg
顧守阮田園
kòo-tsiú gún tshân-hn̂g
他鄉月
thann-hiong ge̍h
照眠床
tsiò bîn-tshn̂g
一暝相思三暝長
tsi̍t-mî siunn-si sann-mî tn̂g
冬天霜風吹袂停
tang-thinn sng-hong tshue buē-thîng
風搖樹影真無閒
hong iô tshiū-iánn tsin bô-îng
一張無字批
tsi̍t-tiunn bô-jī phue
仙寫寫袂成
sian siá siá buē-sîng
望春風
bāng tshun-hong
小同情
sió tông-tsîng
明年趕緊做頭前
mê-nî kuánn-kín tsuè thâu-tsîng
