共伊惜命命
《共伊惜命命》Kā-i Sioh-miā-miā
余國光Î Kok-kong
——————————————
有水感覺無啥物
ū tsuí kám-kak bô-siánn-mih
生活輕鬆閣如意
sing-ua̍h khin-sang koh jû-ì
無水就是大代誌
bô tsuí tiō-sī tuā tāi-tsì
若欲省水靠家己
nā beh síng tsuí khò ka-tī
用水用甲拄拄好
iōng tsuí iōng kah tú-tú-hó
省錢省本閣環保
síng-tsînn síng-pún koh huân-pó
精神快樂無煩惱
tsing-sîn khuài-lo̍k bô huân-ló
咱臺灣是寶島
lán Tâi-uân sī pó-tó
人人節省一滴水
lâng-lâng tsiat-síng tsi̍t-tih tsuí
毋免欠水向望天
m̄-bián khiàm tsuí ǹg-bāng thinn
人人愛惜一滴水
lâng-lâng ài-sioh tsi̍t-tih tsuí
行行有水出頭天
hâng-hâng ū tsuí tshut-thâu-thinn
水是咱的寶貝
tsuí sī lán ê pó-puè
晟養這塊土地
tshiânn-ióng tsit tè thóo-tē
水是咱的性命
tsuí sī lán ê sìnn-miā
咱來共伊惜命命
lán lâi kā-i sioh-miā-miā
水是咱的寶貝
tsuí sī lán ê pó-puè
晟養這塊土地
tshiânn-ióng tsit tè thóo-tē
水是咱的性命
tsuí sī lán ê sìnn-miā
咱來共伊惜命命
lán lâi kā-i sioh-miā-miā
共伊惜命命
kā-i sioh-miā-miā
