花蕊望露
《花蕊望露》Hue-luí Bāng Lōo
方瑞娥Png Suī-ngôo
——————————————
閒夜寂靜月光明
hân-iā tsi̍k-tsīng ge̍h kong-bîng
天星閃爍滿天頂
thinn-tshinn siám-sih muá thinn-tíng
來照在美麗夜景
lâi tsiò tsāi bí-lē iā-kíng
照阮苦命的一生
tsiò gún khóo-miā ê it-sing
希望伊對阮愛情
hi-bāng i tuì gún ài-tsîng
真實又堅定
tsin-si̍t iū kian-tīng
想起著心愛的人
siūnn-khí tio̍h sim-ài ê lâng
一時心虛冷
tsi̍t-sî sim hi-líng
月光照在紅玫瑰
ge̍h-kng tsiò tsāi âng muê-kuì
含情花蕊當欲開
hâm-tsîng hue-luí tng bueh khui
若是來滴著露水
nā-sī lâi tih tio̍h lōo-tsuí
即時變成好花蕊
tsik-sî piàn-sîng hó hue-luí
阮雙人毋知何時
gún siang-lâng m̄-tsai hô-sî
才會再做堆
tsiah ē tsài tsuè-tui
思念著心愛的人
su-liām tio̍h sim-ài ê lâng
不覺吐大氣
put-kak thóo-tuā-khuì
玫瑰花開朱朱紅
muê-kuì-hue khui tsu-tsu-âng
希望露水相疼痛
hi-bāng lōo-tsuí sio thiànn-thàng
全靠你著來幫忙
tsuân khò lí tio̍h lâi pang-bâng
培養阮的好花欉
puê-ióng gún ê hó hue-tsâng
免害阮每夜做夢
bián hāi gún muí-iā tsuè-bāng
夢見你一人
bāng-kìnn lí tsi̍t-lâng
懷念著心愛的人
huâi-liām tio̍h sim-ài ê lâng
心酸目箍紅
sim sng ba̍k-khoo âng
