海湧用舌寫歌譜
《海湧用舌寫歌譜》Hái-íng Iōng Tsi̍h Siá Kua-phóo
簡雅子Kán Ngá-tsú
——————————————
逐工來唱歌
ta̍k-kang lâi tshiùnn-kua
唱予石頭聽
tshiùnn hōo tsio̍h-thâu thiann
唱出溫柔的歌聲
tshiùnn-tshut un-jiû ê kua-siann
恐驚石頭歹記持
khióng-kiann tsio̍h-thâu pháinn kì-tî
海湧時不時拋上岸
hái-íng sî-put-sî pha tsiūnn-huānn
來石頭耳空邊咒誓
lâi tsio̍h-thâu hīnn-khang-pinn tsiù-tsuā
海湧用舌寫歌譜
hái-íng iōng tsi̍h siá kua-phóo
送予石頭做憑記
sàng hōo tsio̍h-thâu tsò pîn-kì
咒誓海水永遠袂焦
tsiù-tsuā hái-tsuí íng-uán bē ta
愛石頭嘛袂使爛
ài tsio̍h-thâu mā bē-sái nuā
海佮石將決心
hái kah tsio̍h tsiong kuat-sim
刻出一堆砂
khik tshut tsi̍t-tui sua
留踮海岸
lâu tiàm hái-huānn
綴海湧捒來捒去
tuè hái-íng sak-lâi-sak-khì
彈奏戀歌
tân-tsàu luân-kua
月光時
ge̍h-kng sî
斟酌聽
tsim-tsiok thiann
進前一句煞
tsìn-tsîng tsi̍t-kù suah
退後一句煞
thuè-āu tsi̍t-kù suah
月光時
ge̍h-kng sî
斟酌聽
tsim-tsiok thiann
進前一句煞
tsìn-tsîng tsi̍t-kù suah
退後一句煞
thuè-āu tsi̍t-kù suah
