在外咱厝人
《在外咱厝人》《Tsǎi-guā Lán-tshù-lâng》
蘇世洪Soo Sè-hông
—————————————
細漢的時陣 聽阿媽講
suè-hàn ê sî-tsūn, thiann a-má kóng
水是故鄉的甜
tsuí sǐ kòo-hiong–ê tinn
大漢的時陣 才當體會
tuā-hàn ê sî-tsūn, tsiah-tong thé-huē
甜在心肝頂
tinn tsǎi sim-kuann tíng
出門的時陣 爸母交代
tshut-mn̂g ê sî-tsūn, pē-bú kau-tài
家鄉的寸土金
ka-hiong ê tshùn-thóo kim
啥時攏毋通放袂記
siánn-sî lóng m̄-thang pang-buě-kì
咱承皇天后土恩
lán sîng Hông-thian Hiǒ-thóo un
人生啊在外漂泊
lên-sing–ah tsǎi-guā phiau-phik
拍拚攏為著前程
phah-piànn lóng uī-tio̍h tsiân-tîng
厝內的相片帶身邊
tshù-lǎi ê siòng-phìnn tuà sen-pinn
偌濟往事講袂清
guā-tsuē óng-sū kóng buě tshing
囝仔時陣愛年兜
kán-á sî-tsūn ài nî-tau
如今思鄉亂糟糟
lû-kim su-hiong luān-tsau-tsau
歡喜只有佇睏夢中
huann-hí tsí-ǔ tǐ khùn-bāng tiong
聽著故鄉唱的歌謠
thiann-tio̍h kòo-hiong tshiùnn ê kua-iâu
天是故鄉的藍
thinn sǐ kòo-hiong–ê nâ
山是故鄉的青
suann sǐ kòo-hiong–ê tshinn
米是故鄉的芳
bí sǐ kòo-hiong–ê phang
茶是故鄉的味
tê sǐ kòo-hiong ê bī
歌是故鄉的腔
kua sǐ kòo-hiong ê khiunn
人是故鄉的親
lâng sǐ kòo-hiong–ê tshen
情是故鄉的真
tsîng sǐ kòo-hiong–ê tsen
月是故鄉的圓
gue̍h sǐ kòo-hiong–ê înn
