幸福人生家己揣
《幸福人生家己揣》Hīng-hok Jîn-sing Ka-kī Tshuē
藍詠思Nâ Īng-su
——————————————
時間一分一秒一直過
sî-kan tsi̍t-hun-tsi̍t-bió it-ti̍t kuè
親像天頂的雲過月
tshin-tshiūnn thinn-tíng ê hûn kuè gue̍h
毋通拄著困難
m̄-thang tú-tio̍h khùn-lân
就倒退
tiō tò-thè
風風雨雨
hong-hong-ú-ú
啥人無拄過
siánn-lâng bô tú–kuè
毋免怨天閣怨地
m̄-bián uàn thinn koh uàn tē
命運前途
miā-ūn tsiân-tôo
家己著計畫
ka-tī tio̍h kè-uē
歲月親像流水
suè-gua̍t tshin-tshiūnn liû-suí
去無回
khì bô-huê
現實的社會
hiān-si̍t ê siā-huē
萬事攏是假
bān-sū lóng-sī ké
毋免佮人計較遐爾濟
m̄-bián kah lâng kè-kàu hiah-nī tsuē
煩惱放予開
huân-ló pàng hōo khui
放予飛
pàng hōo pue
毋管咱的過去抑未來
m̄-kuán lán ê kuè-khì ia̍h bī-lâi
幸福人生家己揣
hīng-hok jîn-sing ka-tī tshuē
