三國演義
《三國演義》Sam-kok Ián-gī
鄭琇月Tēnn Siù-gua̍t
——————————————
一代奸雄曹阿暪
it-tāi kan-hiông Tsô A-bún
無人親像伊這款
bô-lâng tshin-tshiūnn i tsit khuán
預防別人來侵犯
ū-hông pa̍t-lâng lâi tshim-huān
辜負眾人伊甘願
koo-hū tsìng-lâng i kam-guān
兩个爸囝真出名
nn̄g-ê pē-kiánn tsin tshut-miâ
董卓呂布通人驚
Táng Toh Lū Pòo thong-lâng kiann
貂蟬為取怹性命
Tiau-siân uī tshú in sìnn-miā
不顧家己的名聲
put-kòo ka-kī ê miâ-siann
三人桃園來結義
sann-lâng thô-hn̂g lâi kiat-gī
立誓同生佮同死
li̍p-sè tông-sing kah tông-sí
關公張飛佮劉備
Kuan-kong Tiunn Hui kah Lâu Pī
袂輸手足親兄弟
buē-su tshiú-tsiok tshin-hiann-tī
四書五經讀有透
sù-su ngóo-king tha̍k ū-thàu
天文地理總會曉
thian-bûn tē-lí tsóng ē-hiáu
雖然周瑜伊真?
sui-jiân Tsiu Jû i tsin gâu
拄著孔明變無效
tú-tio̍h Khóng-bîng piàn bô-hāu
五關六將齊過刀
ngóo-kuainn lio̍k-tsiòng tsiâu kuè to
義薄雲天世間無
gī po̍k hûn-thian sè-kan bô
千里保嫂揣大哥
tshian-lí pó só tshuē tuā-ko
關公人人都呵咾
Kuan-kong lâng-lâng to o-ló
六出歧山拖老命
lio̍k-tshut Kî-san thua lāu-miā
孔明用計獻空城
Khóng-bîng iōng-kè hiàn khang-siânn
為著自己的國家
uī-tio̍h tsū-kí ê kok-ka
啥物艱苦也毋驚
siánn-mih kan-khóo iā m̄-kiann
七月十五是中元
tshit-gue̍h tsa̍p-gōo sī Tiong-guân
東吳皇帝是孫權
Tong-ngôo hông-tè sī Sun Khuân
為著荊州起禍端
uī-tio̍h King-tsiu khí hō-tuan
暝日不安心操煩
mî-ji̍t put-an sim tshau-huân
八十外歲老英雄
peh-tsa̍p-guā huè lāu ing-hiông
寶刀未老真高強
pó-to bī-nóo tsin ko-kiông
年紀愈濟愈勇壯
nî-kí jú tsuē jú ióng-tsòng
無人毋捌伊黃忠
bô-lâng m̄-pat i N̂g Tiong
九月初九是重陽
káu-gue̍h tshe-káu sī Tiông-iông
諸葛孔明借東風
Tsu-kat Khóng-bîng tsioh tong-hong
殺退曹軍在江中
sat-thuè Tsô-kun tsāi kang-tiong
勢如破竹氣如虹
sè jû phò-tik khì jû hông
十面埋伏受重傷
si̍p-bīn mâi-ho̍k siū tāng-siong
關公猶原袂恐惶
Kuan-kong iu-guân buē khióng-hông
華陀醫術真精通
Huâ-tô i-su̍t tsin tsing-thong
刻骨療傷談笑中
khik-kut liâu-siong tâm-tshiàu tiong
百萬軍中救阿斗
pah-bān kun-tiong kiù A-táu
子龍功夫真正?
Tsú-liông kang-hu tsin-tsiànn gâu
單槍匹馬若水流
tan-tshionn phit-má ná tsuí lâu
曹軍無人擋會牢
Tsô-kun bô-lâng tòng ē-tiâu
千想萬想想袂澈
tshian-siūnn bān-siūnn siūnn buē-thiat
三國盡歸司馬懿
Sam-kok tsīn kui Su-má Ì
爭權奪利費心血
tsing-khuân tua̍t-lī huì sim-hiat
到尾猶原無利益
kàu-bué iu-guân bô lī-ik
