男性的性命
《男性的性命》Lâm-sìng ê Sìnn-miā
文夏Bûn-hā
——————————————
男子漢
lâm-tsú-hàn
若欲離開故鄉彼个時
nā beh lī-khui kòo-hiong hit ê sî
哪通來予人
ná thang lâi hōo-lâng
看著男兒的珠淚
khuànn-tio̍h lâm-jî ê tsu-luī
為將來抱著大志
uī tsiong-lâi phāu tio̍h tāi-tsì
行到他鄉里
kiânn kàu thann-hiong-lí
若毋是衣錦榮歸
nā-m̄-sī ì-kím îng-kui
一定袂倒來
it-tīng bē tó–lâi
天頂的月光淒冷
thinn-tíng ê gue̍h-kng tshe-líng
加添人稀微
ka-thiam lâng hi-bî
又想起故鄉彼个
iū siūnn-khí kòo-hiong hit ê
可憐的女兒
khó-liân ê lú-jî
暫時的離別日子
tsiām-sî ê lî-pia̍t ji̍t-tsí
請你也忍耐
tshiánn lí iā jím-nāi
窗前的花蕊若開
thang-tsîng ê hue-luí nā khui
我就會倒來
guá tsiū ē tó–lâi
他鄉的秋天暗暝
thann-hiong ê tshiu-thinn àm-mî
樹葉吹落地
tshiū-hio̍h tshue lo̍h-tē
孤單若彈著吉他
koo-tuann nā tuânn tio̍h gì-tah
聲音帶悲哀
siann-im tài pi-ai
思戀你輾輾規暝
su-luân lí tián-tián kui-mî
睏也睏袂去
khùn iā khùn buē-khì
今夜我真愛見你
kim-iā guá tsin ài kiàn lí
心愛的女兒
sim-ài ê lú-jî
