新營囡仔
《新營囡仔》Sin-iânn Gín-á
鄭進一Tēnn Tsìn-it
——————————————
又閣來想起
iū-koh lâi siūnn-khí
囡仔時代的日子
gín-á sî-tāi ê ji̍t-tsí
感覺心肝內
kám-kak sim-kuann-lāi
有講袂出來的滋味
ū kóng bē tshut-lâi ê tsu-bī
有艱苦也有甜
ū kan-khóo iā ū tinn
有心酸也有歡喜
ū sim-sng iā ū huann-hí
雖然經過遐濟年
sui-jiân king-kuè hiah tsuē nî
我也袂當放袂記
guá iā bē-tàng pàng-buē-kì
無論親情抑是厝邊
bô-lūn tshin-tsiânn ia̍h-sī tshù-pinn
散赤也袂怨妒人有錢
sàn-tshiah iā bē uàn-tòo lâng ū-tsînn
無論朋友抑是兄弟
bô-lūn pîng-iú ia̍h-sī hiann-tī
拄著風雨鬥陣覕
tú-tio̍h hong-hōo tàu-tīn bih
勤儉奮鬥過日子
khîn-khiām hùn-tàu kè ji̍t-tsí
拍拚無分我佮你
phah-piànn bô hun guá kah lí
做陣來唱著
tsuè-tīn lâi tshiùnn tio̍h
彼當時懷念的歌詩
hit-tong-sî huâi-liām ê kua-si
唱一條思雙枝
tshiùnn tsi̍t-tiâu su-siang-ki
離開故鄉遐濟年
lī-khui kòo-hiong hiah tsē nî
唱一條舊情綿綿
tshiùnn tsi̍t-tiâu kū-tsîng mî-mî
愛人毋知去佗位
ài-jîn m̄-tsai khì tó-uī
唱一條悲情城市
tshiùnn tsi̍t-tiâu pi-tsîng siânn-tshī
內面有我也有你
lāi-bīn ū guá iā ū lí
唱出著
tshiùnn-tshut tio̍h
咱溫暖的過去
lán un-luán ê kuè-khì
唱一條思雙枝
tshiùnn tsi̍t-tiâu su-siang-ki
唱一條舊情綿綿
tshiùnn tsi̍t-tiâu kū-tsîng mî-mî
唱一條悲情城市
tshiùnn tsi̍t-tiâu pi-tsîng siânn-tshī
唱一條送君情淚
tshiùnn tsi̍t-tiâu sàng kun tsîng-luī
