胭脂水粉
《胭脂水粉》Ian-tsi Tsuí-hún
潘麗麗Phuann Lē-lē
——————————————
夕陽像胭脂
si̍k-iông tshiūnn ian-tsi
白雲若水粉
pe̍h-hûn ná tsuí-hún
溪水濕澹阮的裙
khe-tsuí sip-tâm gún ê kûn
梳妝打扮為山崙
se-tsng tánn-pān uī suann-lūn
天地逐暝做伙睏
thinn-tē ta̍k-mî tsuè-hué khùn
逍遙自在無怨恨
siau-iâu tsū-tsāi bô uàn-hūn
胭脂點喙脣
ian-tsi tiám tshuì-tûn
面肉抹水粉
bīn-bah buah tsuí-hún
妖嬌增加幾若分
iau-kiau tsing-ka kuí-lō hun
毋過看來無像阮
m̄-koh khuànn–lâi bô tshiūnn gún
為著生活共歌唱
uī-tio̍h sing-ua̍h kā kua tshiùnn
唱出討趁的心酸
tshiùnn-tshut thó-thàn ê sim-sng
紅色的胭脂
âng-sik ê ian-tsi
白色的水粉
pe̍h-sik ê tsuí-hún
胭脂水粉真齊勻
ian-tsi tsuí-hún tsin tsiâu-ûn
洗清了後賰淚痕
sé tshing liáu-āu tshun luī-hûn
目屎拭焦才是阮
ba̍k-sái tshit ta tsiah sī gún
風吹頭毛若飛雲
hong tshue thâu-mn̂g ná pue-hûn
