花開毋著時
《花開毋著時》Hue Khui M̄-tio̍h Sî
潘麗麗 Phuann Lē-lē
——————————————
舊衫一領過了期
kū-sann tsi̍t-niá kuè-liáu kî
崎嶇世路佗位去
khi-khu sè-lōo tó-uī khì
飛來飛去你抾起
pue-lâi pue-khì lí khioh khí
穿佇身軀不再拆分離
tshīng tī sin-khu put-tsài thiah hun-lī
求天求地予阮照顧你
kiû-thinn kiû-tē hōo guán tsiàu-kòo lí
寫出人生的傳奇
siá tshut jîn-sing ê thuân-kî
寫出人生的傳奇
siá tshut jîn-sing ê thuân-kî
阮的深愛像茶米
gún ê tshim-ài tshiūnn tê-bí
捲甲密密袂透氣
kńg kah ba̍t-ba̍t buē thàu-khì
你的恩情若滾水
lí ê un-tsîng ná kún-tsuí
沖出阮的人生好滋味
tshiong tshut gún ê jîn-sing hó tsu-bī
一葉一葉勻勻仔漸漸開
tsi̍t-hio̍h tsi̍t-hio̍h ûn-ûn-á tsiām-tsiām khui
清芳透入咱心脾
tshing-phang thàu ji̍p lán sim-pî
清芳透入咱心脾
tshing-phang thàu ji̍p lán sim-pî
明明一欉桃花枝
bîng-bîng tsi̍t-tsâng thô-hua-ki
怎樣蒼天放袂記
tsuánn-iūnn tshong-thian pàng buē-kì
害阮花開無對時
hāi gún hue khui bô-tuì-sî
結果煞來墜落烏暗池
kiat-kó suah lâi tuī-lo̍h oo-àm-tî
宛然春蠶秋天吐無絲
uán-jiân tshun-tshâm tshiu-thinn thòo bô si
肝腸寸斷吼甲死
kan-tshiâng tshùn-tuān háu kah sí
肝腸寸斷吼甲死
kan-tshiâng tshùn-tuān háu kah sí
