種匏仔生菜瓜
《種匏仔生菜瓜》Tsìng pû-á Senn Tshài-kue
劉燕燕Lâu Iàn-iàn
——————————————
林菝開花滿四界
ná-pa̍t khui-hue muá-sì-kè
張飛本來就歹性地
Tiunn Hui pún-lâi tiō pháinn-sìng-tē
風流阿君眾人的
hong-liû a-kun tsiòng-lâng–ê
一个交過又一个
tsi̍t-ê kau–kuè iū tsi̍t-ê
種匏仔共阮生菜瓜
tsìng pû-á kā gún sinn tshài-kue
烏鶖騎牛也會跋落地
oo-tshiu khiâ gû iā ē pua̍h lo̍h-tē
意愛的人真歹揣
ì-ài ê lâng tsin pháinn tshuē
搭著一个咧夯枷
tah-tio̍h tsi̍t-ê teh giâ-kê
夭壽仔講阮若柴耙
iáu-siū-á kóng gún ná tshâ-pê
出門無愛喔予阮綴
tshut-mn̂g bô-ài–ooh hōo gún tuè
嫌阮生做無四配
hiâm gún sinn-tsuè bô sù-phuè
毋知自己厚面皮
m̄-tsai tsū-kí kāu-bīn-phuê
愛人仔未交看詳細
ài-jîn-á buē kau khuànn siông-sè
像我交著喔遮狼狽
tshiūnn guá kau–tio̍h ooh tsiah liông-puē
空喙哺舌亂亂畫
khang-tshuì-pōo-tsi̍h luān-luān uē
酒桶筊鬼伊一个
tsiú-tháng kiáu-kuí i tsi̍t-ê
