高雄驛起飛
《高雄驛起飛》Ko-hiông-ia̍h Khí-pue
滅火器樂團Bia̍t-hué-khì Ga̍k-thuân
——————————————
閣一幫火車
koh tsi̍t-pang hué-tshia
漸漸欲起行
tsiām-tsiām beh khí-kiânn
我講再會啦
guá kóng tsài-huē–lah
我會永遠佇遮
guá ē íng-uán tī tsia
祝福你一路順風
tsiok-hok lí tsi̍t-lōo sūn-hong
去追求屬於你的夢
khì tui-kiû sio̍k-î lí ê bāng
等你轉來的彼一工
tán lí tńg–lâi ê hit-tsi̍t-kang
這城市已經無仝
tse siânn-tshī í-king bô-kāng
來自海洋鹹鹹的風
lâi-tsū hái-iûnn kiâm-kiâm ê hong
陣陣吹入鹽埕埔
tsūn-tsūn tshue ji̍p Iâm-tiânn-poo
藏入塗跤的鐵枝路
tshàng ji̍p thôo-kha ê thih-ki-lōo
畫著全新的地圖
uē tio̍h tsuân-sin ê tē-tôo
愈來愈鬧熱的街仔路
jú-lâi-jú lāu-jia̍t ê ke-á-lōo
消失的地下道佮高架橋
siau-sit ê tē-hā-tō kah ko-kè-kiô
我恬恬生活
guá tiām-tiām sing-ua̍h
佇城市的正中央
tī siânn-tshī ê tsiànn tiong-ng
記錄改變的每一步
kì-lo̍k kái-piàn ê muí tsi̍t-pōo
海風吹啊吹
hái-hong tshue–ah tshue
高雄準備欲飛
Ko-hiông tsún-pī beh pue
飛向未來
pue hiòng bī-lâi
對全世界
tuì tsuân sè-kài
展現咱的美麗
tián-hiān lán ê bí-lē
夢想揣啊揣
bāng-sióng tshuē–ah tshuē
原來佇出身的土地
guân-lâi tī tshut-sin ê thóo-tē
願望是平安生活
guān-bōng sī pîng-an sing-ua̍h
會得過
ē-tit kuè
上愛的人
siōng ài ê lâng
永遠做伙
íng-uán tsò-hué
時間咧經過
sî-kan teh king-kuè
風景咧改變
hong-kíng teh kái-piàn
骨力的人
kut-la̍t ê lâng
將故事寫佇這片土地
tsiong kòo-sū siá tī tsit phiàn thóo-tē
每一遍挑戰
muí tsi̍t-piàn thiau-tsiàn
咱堅心做伙
lán kian-sim tsò-hué
咱上愛的所在
lán siōng ài ê sóo-tsāi
準備欲飛
tsún-pī beh pue
