情份
《情份》Tsîng-hūn
林宏銘Lîm Hông-bîng
——————————————
昨暝的風雨拍醒阮
tsa-mî ê hong-hōo phah-tshínn gún
擾亂阮攏袂睏
jiáu-luān gún lóng buē khùn
透早來看過小山崙
thàu-tsá lâi khuànn-kuè sió suann-lūn
心憂悶
sim iu-būn
親像踮黃昏
tshin-tshiūnn tiàm hông-hun
哎喲哎喲
aih-iooh aih-iooh
思慕一陣陣喔
su-bōo tsi̍t-tsūn-tsūn–ooh
我毋甘放你遐爾遠
guá m̄-kam pàng lí hiah-nī hn̄g
夜蟲也替阮心悶
iā-thâng iā thè gún sim būn
莫非你臆阮心軟
bo̍k-hui lí ioh gún sim nńg
抑是你故意刺探阮
ia̍h-sī lí kòo-ì tshì-thàm gún
喔~哎喲哎喲
ooh~ aih-iooh aih-iooh
心肝冷恂恂喔
sim-kuann líng sún-sún–ooh
目屎煞鬧熱滾滾
ba̍k-sái suah lāu-jia̍t kún-kún
若攏無半點情份
nā lóng bô puànn-tiám tsîng-hūn
又何必計較這陣
iū hô-pit kè-kàu tsit-tsūn
希望你真心疼惜阮
hi-bāng lí tsin-sim thiànn-sioh gún
